بلوچستان ءِ جتاجتائیں دمگاں چار مردم آوار جنگ ءُ یکے دیم ءَ آرگ بیتگ

بلوچستان ءِ جتاجتائیں دمگ زھری ءُ کیچ ءَ چار مردم آوار جنگ بیتگ ءُ یک دیم ءَ آرگ بیتگ تھری ایم پی او ءِ بُنیاد ءَ جیل ءَ برتگ-

گیشیں ھالانی رِد ءَ بلوچستان ءِ دمگ چہ ھُزدار ءَ ھالانی رِد ءَ پاکستانی پوج ءِ نیمگ ءَ گوستگیں یک ماھے ءَ چہ برجاہ پوج ءِ لشکر کشی ءِ میان ءَ بازیں مردمے آوار جتگ ءُ ناشناسیں جاھے ءَ برتگ اَنت-

نوکیں ھالانی رِد ءَ پنچ روچ ءَ ساری پاکستانی پوج ءَ گزان ءِ نزیک ءَ 2018 ءَ چہ زورانسری بیگواہ راشد حسین ءِ سیادانی لوگانی سر ءَ بیڑبرتگ، ھمے وھد ءَ سیاد منان قادر ء عبدالقادر میروزئی ھوار دگہ بازیں سیادے آوار جتگ ءُ وتی ھمراھی ءَ برتگ اَنت-

اِھوالکار ءِ رِد ءَ اے میان ءَ پاکستانی پوج ءَ لوگانی سر ءَ تیرگواری کتگ ءُ زالبول چُک لَٹ ءُ کُٹ کتگ اَنت-

ھالانی رِد ءَ دزگیر کنگ بیتگیں گیشتریں مردم پد ءَ یل کنگ بیتگ اَنت بلے منان قادر تنی وھدے پاکستانی پوج ءِ دست ءَ اِنت-

زانگ بہ بیت کہ پاکستانی پوج ءَ گوستگیں ماہ ستمبر ءَ بُرزی کاروائیاں ءُ ڈرون اُرشاں پد بیست ھپت ستمبر ءَ جھلی آپریشن بندات کتگ، اے میان ءَ بازیں روچاں تاں زھری ءَ کرفیو جنگ بیتگ اَنت ءُ راج ءِ سُر پُر داشتگ اَنت-

چہ زھری ءَ ھال سر بیتگ آپریشن ءِ میان ءَ بازیں مردمے آوار جنگ ءُ ناشناسیں جاھے ءَ برتگ اَنت وھدے کہ بُرزی اُرشاں تنی وھدے بازیں زالبول ءُ چُکاں ھوار درزنانی مردم بیران بیتگ اَنت-

ھمے وڑ کیچ ءِ دمگ چہ مند ءَ پاکستانی پوج ءَ سے ورنا آوار جتگ ءُ بیگواہ کتگ اَنت-

اِھوالکار ءِ رِد ءَ گوستگیں شپ ساھت سے ءَ مند ءِ دمگ بلوچ آباد ءَ پاکستانی پوج ءِ کارندھاں بیڑبرتگ سے ورنا ھاروان ء محمد جان، آئی ءِ برات محمود ءُ فھد ء ھاجی عثمان آوار جتگ ءُ گوں وت برتگ اَنت-

تنی وھدے آیانی درگت ءَ ھچ وڑیں ھال نیست-

دومی نیمگ ءَ چہ کراچی ءَ زورانسری بیگواہ کنگ بیتگیں میر یوسپ علی قلندرانی دیم ءَ آرگ بیتگ- ھالانی رِد ءَ آ تھری ایم پی او ءِ بُنیاد ءَ دزگیر کتگ ءَ سینٹرل جیل ھُزدار ءَ برتگ اَنت-

زانگ بہ بیت کہ میر یوسپ قلندرانی ھپدہ اگست 2025 ءَ چہ کراچی ءَ پاکستانی پوج ءُ چیریں ادارھانی دست ءَ زورانسری بیگواہ کنگ بیتگ-

یات بہ بہ اِت کہ میر یوسف قلندرانی ءِ دو برات 2014 ءَ تاں بیگواہ اَنت آیانی درگت ءَ ھچ وڑیں ھال نیست-