ایمنسٹی انٹرنیشنل ءَ پاکستان ءَ 32 مردم کہ آیانی تہ ءَ بازیں بلوچ باسکے ھوار انت آ انسداد دھشتگردی ءِ ایکٹ 1997 EE -11 ءِ رد ءَ اے مردماں ناشرکاری ءِ لڑ ءَ ھورا کنگ ءِ پیسلہ انسانی ھکانی مزنیں بگیرداری ءِ گوشتگ ۔
ایمنسٹی انٹرنیشنل ءِ جنوبی ایشیا ءِ ڈپٹی ریجنل ءِ ڈائریکٹر بابو رام پنت ءَ گوشتگ کہ من مانی ءُ بید پٹ ءُ پول ءَ اے مردماں ھوار ایمنیں بلوچ باسک ناشرکاری ءِ لڑ ءَ ھوار کنگ بوتگ انت ۔اے انساپ ، مردمانی آجوئی ، رازداری ءُ سرءُپرانی آجوئی ءِ سرا ارش ئے ۔ آ پیسلھے چیلنج کنگ ءَ ھچ وڈیں موہ دیگ نہ بوتگ ۔
آئی ءَ گوشتگ کہ ایمنسٹی انٹرنیشنل ءَ بازیں وھدے بیت کہ پاکستان ءَ انسداد ءِ دھشتگردی ءِ کانودانی سرا شک دارگ ءَ انت پرچاکہ اے میان استمانی انسانی ھکانی رد ءَ نہ انت ریاستی ادارھاں واک دنت ءُ ھنچیں مردمانی نشانگ کنگ ءِ ھاتر ءَ کارمرز بیت کہ بس وتی بنکی انسانی ھکانی کارمرز کنگ ءَ انت ۔ اے کانود ءَ بگیرداری ءُ تنکیدی تواراں ایرموش کنگ ءَ کارمرز کنگ بوگ ءَ انت ۔
بابو رام پنت ءَ گوشتگ کہ اے گامگیج ھنچیں وھدے ءَ دیم ءَ اتکگ کہ وھدیکہ بلوچستان ءِ بازیں دمگاں درآمیدگسی کوشانی رپورٹ دیم ءَ آیگ ءَ انت ۔ ھاسکر ھزدار ءِ دمگ زھری ءَ 25 ستمبر ءِ کہ لاک ڈاؤن کہ آودا سرءُ پرانی سرا بندش ءَ ھوار دامگ ھم بند انت کہ آجوئی درشان ءِ بگیرداری ئے ۔
آئی ءَ گوشتگ کہ ما چہ پاکستانی سرکار ءَ لوٹ کن ایں کہ آ درسیں باسکاں اے لڑ ءَ ھوار اے وڈیں دگہ لڑاں چوش کہ ایگزیٹ کنٹرول لسٹ ءُ پاسپورٹ لسٹ ءَ چہ زوت در بہ کنت، پرچاکہ اے لڑ ھم لس مھلوک ءِ سرا بندش جن انت ۔ سرکار ءَ لوٹ ایت کہ آ کانودانی پاسداری ءَ بکنت ءُ سانمندیں مردماں آزات ءُ بے جانبدار آمیدگس ءَ وتی گپانی جنگ ءِ موہ دیگ بہ بیت ۔ اشی ءَ ابید سرکار بلوچستان ءِ دمگ زھری ءَ پوجی لشکر کشی ءِ میان ءَ بیران بوتگیں مردمانی شریں وڈی ءَ پٹ ءُ پول ءَبہ کنت ۔ انٹرنیٹ پچ کنگ بہ بیت درسین پھازگی ادارھاں میان استمانی کانودانی پاسداری کنگ لوٹ ایت ۔
زانگ بہ بیت بلوچستان سرکار ءَ دو ءُ 16 اکتوبر ءَ وتی جار ءِ تہ ءَ ھزدار ، کیچ ءُ چاگی ءَ 32 مردم ناشرکاری ءِ لڑ ءَ ھوار کتگ انت کہ آیانی تہ ءَ زالبولیں باسک ڈاکٹر سبیھہ بلوچ ، سمی دین بلوچ ، ناز گلنءُ شلی ھوار انت ۔
اے گامگیجانی رد ءَ اے مردمانی سرا چم ایر کنگ بوگ ءَ انت ۔ اے سر ءُ پرانی سرا بندش انت آیاں وتی دمگ ءَ درآیگ ءَ پولیس ءِ موکل گرگ لوٹ ایت ۔
درشان ءِ تہ ءَ گوشگ بیتگ کہ زھری ءِ دمگ ھزدار ءَ برجاھیں پوجی لشکر کشی ءِ میان ءَ بازیں مردمانی بیرانی ھال سر بوتگ انت کہ آیانی تہ ءَ زھگ ھم ھوار انت ۔