ناگُمان ءِ آزمانک “الاج” من کُھدہ ءُ دیوانگیں اِزھار
نبشتہ کار: زبیر گلاب
دی بلوچستان پوسٹ
اِزّو من اَنو اے کاگد ءَ کہ پہ تو نبشتہ کنگ ءَ آں منی دیم ءَ “ناگمان” ءِ نبشتگیں آزمانکانی کتاب “شیتان” ایر اِنت ءُ راستیں کش ءَ ھما (Powerback) اِنت تو اِینٹرنٹ کار مرز کُتگ ءُ پنجاہ دانگ ءَ بُرز اولی کلاس ءِ (دپتر) کاپی اَنت کہ پہ چیک کنگ ءَ ایر اَنت ءُ وھد سُھب اِنت ھمیش اِنت لِین انی کمّو ساھتے ءَ پیش اتکگ اِت اَنت ءُ پد ءَ شت اَنت من ھم پد ءَ مرچی واب ءَ چی ماھلہ پاد اتکگ آں ءُ من جُھد کُتگ اَت کہ پہ ترا نمدی یے روان بدیاں ءُ کُھدہ ءَ مرچاں سرکاری وانگ جاہ یلہ کُتگ مرچاں اِد ءَ مئے اوتاک والا اسکول ءَ وانینگ ءَ اِنت ھمیش اِنت یک کلاکے ءَ چہ پیش در اَتک ءُ شُت۔
اِزّو یار ترا یات اِنت زِمستان اَت یک ءُ دُو ماہ ءَ من ءُ تو ءُ کُھدہ ءَ یک وھدے ٹھینتگ اَت شپ ءَ ۸:۳۰ ھشت نیم ءَ داں ۱۱:۰۰ یازدہ بج ءَ کتاب ونت ءُ تو بِنداتی ءَ لین ءِ کتاب “ریاست اور انقلاب” بِندات کُت ءُ پد ءَ نیم ءَ یلہ دات ءُ گُشت “اڑے زُبیر مھاز اے منی پھم ءَ آیگ ءَ نہ اِنت ءُ پد ءَ ایشی ءَ چینچو “Terms ” مان اِنت ھُشکیں (Terminology) “لیننزم” “ماکسسزم” اے نہ بیت منی گوما” ءُ پد ءَ من گُشت کُھدہ انگور تُرپش اَنت ءُ ما ترا شَر کلاگ گِپت ءُ تو سیگریٹے رُوک کت من گُشت تو واکی اسلی یے ئے ءُ تو گُشت زمستان ءَ سگریٹ ءِ کشّگ تاھیر دنت ءُ پد ءَ ھاس ھمے وھد ءَ کہ تو کتاب وانگ ءَ بہ بہ ئے ءُ ترا واب گِرگ ءَ بہ بیت بس یک ٹالے بہ کَش برابر بہ ئے بلے یار پد ءَ زمستان اِنت اڑے اِزّو من بِنداتی ءَ ناگُمان ءِ نام گِپتگ اَت ناگُمان ءِ کتاب ءَ یک آزمانکے مان اَت ءُ آئی ءِ سر ھال اِنت “اِلاج” ایشی ءِ بنداتی رد ءَ ھمے نبشتہ اَت کہ “مرچاں گُلام پِکنکاں گون نہ اِنت” گوں اے رِد ءِ وانگ ءَ من ترا گیشتِر جیڑگ ءَ لَگ اِتاں پرچا کہ اے مئے وڑ ءَ اَت ایشانی تہ ءَ یکے منی وڑ ءَ نودربرے اَت ءُ دومی چو تئی ءَ کار ءَ اَت گُڑا شپ ءَ ھور بُوت ءُ سُھب ءَ سنگتاں پِکنِکے ٹھینت دیم پہ کوھاں ھور ءَ پد زمین کُوہ ءُ پچیں دیار گیشتِر زیبا بنت گُڑا ھمد ءَ نودربریں سنگت کوہ ءِ ٹُلّ ءَ نشت ءُ “گُش اِیت اے نِدارگ مناں سک دوست بنت پد ءَ گُلام ءَ درائینت”من ءَ بلاھیں پریشانی یے ءَ گور جَتگ من اے دِگہ سنگتانی کِر ءَ نام نہ گِپتگ تو ڈاکٹری وانگ ءَ ئے بلکیں مناں اِلاجے یا سر ءُ سوجے بہ کن ئے اے نِدارگانی انو تو گپ کُت من ءَ پیسر ءَ اَنچو تئی وڑ ءَ دوست بُوتگ اَنت بلے مرچاں من وھدے پہ سواد ءَ درکایاں ڈیھ ءِ زید ءُ نِدارگاں گِنداں دل گِیمِر اِیت تکانسر باں دم پہ سَھت ھمے ھیال کیت کہ منی ڈیھ ءِ اے نِدارَگ چہ منی دست ءَ روان اَنت انچیں وھدے کیت من ایشانی واھُند نہ باں” دومی سنگت ءَ گُشت “گُلام جان ڈیھ ءِ دوستی نادراھی یے نہ اِنت” اے گپ ءَ من ترا اے واستا ھال دیگ ءَ آں کہ ترا یات بیت ما ءُ شُما ھم انچیں مُوسمے ءَ کتلی چاہ ءِ کوپ اے دِگہ لھتیں ساز ءُ سامان زُرت اَنت دیم پہ کُوھاں شُت اِیں راہ ءَ ھور ءَ شَنز اِت نِدارگاں تو کید کنان اِت ئے ءُ سجّھیں راہ ءَ تو گُشت “کُھدہ زمین ءَ گِند ئے چُون ڈولدار اِنت؟” ءُ کُھدہ مھاز ءِ نام اَت پہ کُنت ما گُشت نِزّوہ ءِ کُھدہ۔
ھر جاگہ کہ مئے سر کپت تو گُشت زمین زمین ءُ دِگہ ھِچ ءُ ھِچ گُڈ سر ءَ منی سر ءَ تو اکسے ھم روان داتگ اَت ءُ راھمین بلوچ ءِ گُشتگیں سوتے ءَ گوں:
“سُھریں شینکاں روچ نہ جلّ اِیت، سبزیں شینکاں سردیں ماہ’
“من وَ جّلاں بلکیں بے من چندے کَس ویران بہ بیت’
“چوش مَیا کہ مارا مئے اے تھنائی تاوان بہ بیت،،
من ءَ را گُشت “زُبیر من اے اکس ءَ سِنیپ ءَ پُوسٹ کناں چون اِنت؟” من گُشت یار شوک اِنت بلے دِگہ گپے تو ھرچ ویڈیوے کہ جُوڑ کُتگ وھدے سوتے مان کنگی بُوتگ تو مناں جُست کُتگ نزاناں چی ءَ من باز رند ءَ جیڑ اِتگ کہ ترا جُست بہ گِراں بلے جست نہ کُتگ ءُ کُھدہ ءِ کلاگ “اے گانا اِد ءَ وش نہ اِنت شوک نہ اِنت” تو بھ پہ سوت ءِ گچین کنگ ءَ نہ گُشت تئی آئی ءِ مَستریں داوہ ھمے کلاگ ءِ بندگ اَت کہ شوک نہ اِنت بلے یک شپے من ءَ را یات اِنت تو گُشت “زُبیر تو شوکیں سوت گُوشدار ئے بیا من “انسٹاگِرام” ءَ “اکاؤنٹے پچ کناں تو سوتاں گچین کن ءُ من ویڈیو جُوڑ کناں” من ھو کُت۔
اِزّوو ترا را یات اِنت گُڈّی ءَ ھور ءِ مُوسم اَت تو پُون کُت بیا رو اِیں کُھدہ ءَ زیر بیا بلے کُھدہ لوگ ءَ اَت ءُ ساھتے گوست ھور ءَ ایر دات ءُ ھور ءَ رَند تو ءُ کُھدہ وت اتک اِت اوتاک ءَ من گُشت یار اے مُوسم ءَ ما باید اِنت کوہ ءَ بوتین اِیں بلے سنگت شُما ءُ ما وَ اے نِدارگاں گِند ایں ھو ھو اِزو”من اڑے اے وھدی سَر ءَ رندگ ءَ اِت آں کہ ھور ترند بُوت ھیر تو بُرو چاھے جُوڑ کن کہ سر درد ءَ اِنت ءُ چیزے ھم بہ گِر پہ ورگ ءَ ” کُھدہ ءَ گوانکُو کَش اِت ءُ لوگ ءَ ھور ءِ گِپتگیں نِدارگاں مناں ءُ ترا پیشدارگ ءَ اَت ءُ تو گُشت “اڑے کُھدہ یار اے ویڈیواں مناں بدے من شوکیں ویڈیوے جُوڑ کناں” کُھدہ ءَ یک برے اڑی کُت بلے پد ءَ ترا دات اَنت ئِے ءُ تو ویڈیو جُوڑ کُت ءُ مناں گُشت” اُستاد آرپ ءِ گُشتگیں سوت
“بہ شَنز پہ مناں بے مھریں رھمت ءِ شَنزے”
“کِشار مُرت اَنت منی گَنجیں واھگ ءِ شَھر ءَ”
من ایرگیج کُت ترا دات ءُ تو پُوسٹ کُت ءُ گُشت “مئے اڑے لوگ ءِ پیژگاہ کسان اِنت دِگہ من ھم اے وڑیں نِدارگ کید کُتگ اَت “ بلے یار اِزوو تئی زمین تئی لوگ ءِ پیژگاہ کسان اَت بلے تو انگت دِگہ چِد ءُ کستریں زمینے پہ وت زُرت؟ بلے من گُڈ سر ءَ ترا ھمے گُشاں کہ تو بے کِساس گیر کا ئے یارر گُواڑگ تئی زھیر من ءَ تہ ءَ چُو رمیز ءَ وران اَنت زُبیر کمبر ءِ اے شیر تو گُشتگ اَت:
“من وَ جّلاں بلکیں بے من چندے کَس ویران بہ بیت”
تھنا چندے کَس نا تیوگیں ھَلک ویرانگ اِنت کُوہ ءُ کِشک درچک ءُ دار کُل ویرانگ اَنت دریگتیں تو بہ جَلّ اِتین ئے بلے اِزّوو ھما روچ ءَ چہ پد ما تھنا بُوت اِیں ناں ما کُوہ ءَ رویں نا دِگہ جاگھے من اوتاک ءَ کپتگاں ءُ کُھدہ لوگ ءَ ترا باریں پہ کُھدہ ءِ چاھاں زھیر کنت یا نا؟
بیا ایوکی ءِ پُرّیں آس مئے اندر ءَ ساہ کشّگ ءَ اِنت
بیا ڈس وھد ءِ کیگدیں بازار تانگو رپتگ اَنت۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-