بلوچستان ءِ جتاجتائیں دمگ ءُ کراچی ءَ پاکستانی پوج ءِ دست ءَ زورانسری بیگواہ کنگ بیتگیں سے مردم یل کنگ بیتگ انت ءُ یکے آوار جنگ بیتگ-
گیشیں ھالانی رِِد ءَ کراچی ءِ دمگ چہ صدر ءَ زورانسری بیگواہ کنگ بیتگیں کاشف یعقوب سے ماہ ءَ پد یل بیتگ – کاشف یعقوب بیست نُھ جولائی 2025 ءَ سادھیں پوشاکانی کارندھاں آوار جتگ کہ چریشی ءَ پد آئی ءِ ھچ وڑیں ھال سر نہ بیتگ-
کھول رِد ءَ کاشف یعقوب بیست یک اکتوبر 2025 ءِ شپ ءَ ناشناسیں جاھے ءَ یل کتگ- کھول ءِ گوشگ اِنت کہ سے ماہ زورانسری آوار جنی ءِ میان ءَ دیم ءَ اتکگیں جاور ءُ سرپدی دیم ءَ نیتکگ اَنت-
اشی ءَ اَبید مستونگ ءِ جھمنندیں عبدالناصر ء عبدالخالق جھمنند کھڈکوچہ کہ پاکستانی پوج ءَ یازدہ اکتوبر ءَ چہ کلات کوھنگ ءَ ھما وھد ءَ زورانسری بیگواہ کتگ وھدے آ فجر نماز ءِ وانگ ءَ نزیکیں مسیت ءَ روگ ءَ بیتگ- مروچی یل بیتگ لوگ ءَ سر بیتگ بلے لَٹ ءُ کُٹ ءَ چہ آئی ءِ جاور ناگیگ اَنت-
انچش بلیدہ ءِ دمگ چہ الندور ءَ سیادی داروکیں بیگواھیں ورنا ادھم ناسر یل بیتگ – ادھم ناسر گوستگیں ماہ ءَ چہ زورانسری بیگواہ کنگ بیتگ-
دومی نیمگ ءَ چہ مستونگ ءَ سیادی داروکیں عدنان رند ء عبدالقدوس یکرندے پد ءَ پاکستانی پوج ءَ آوار جتگ ءُ بیگواہ کتگ-
دمگی اِھوالکار ءِ رِد ءَ اے وئیل اکتوبر 2025 ءَ بیتگ – ھدے عدنان رند آئی ءِ موباھل دکان ءَ چہ پاکستانی پوج ءَ آوڑ جتگ ءُ بیگواہ کتگ-
چمّگدانی رِد ءَ کارندھاں عدنان رند آوار جنگ ءَ کساس یک کلاکے ءَ پد دوبر دکان ءَ اتکگ اَنت، دکان ءِ کُبّل پروشتگ ءُ تہ ءَ پُترتگ اَنت ءُاود ءَ ھستیں سرجمیں موباھل ءُ دگہ گرانبھائیں سامان گوں وت برتگ اَنت-
اے اولی رند نہ اِنت وھدے عدنان آوار جنگ بیتگ اشی ءَ ساری شش ستمبر 2024 ءَ ھم آ چہ لوگ ءَ کلی کڑک مستونگ ءَ شپ ءَ پاکستانی پوج ءَ آوار جتگ –