بلوچستان ءِ جتاجتائیں دمگاں بے آپی ءُ بی ایس مراگش ءِ بندش ھلاپ ءَ زھرشانی کنگ بیتگ

بلوچستان ءِ جتاجتائیں دمگ گوادر ءُ مستونگ ءَ بے آپی ءُ بی ایس مراگش ءِ بندش ھلاپ ءَ روانک ءُ زھرشانی-

گیشیں ھالانی رِد ءَ جنکانی ڈگری کالج نوشکی ءِ نودربراں کالج ءَ بی ایس مراگش ءِ بندش ءِ ھلاپ ءَ زھرشانی روانک کش اِتگ، روانک جنکانی کالج ءَ چہ بندات بیتگ پاکستان ایران ءِ بُنجاھی شھدگ (این – 40 ) سر بیتگ اَنت، اود ءَ نودربراں نوشکی کراس نزیک ءَ شھدگ سر ءَ نندانک داتگ گاڑیانی روگ بند بیتگ اَنت-

زھرشانی ءِ میان ءَ نودربراں ھکومت ءِ ھلاپ ءَ ناراہ جنان ءَ گوشتگ کہ یک نیمگے صوبائی ھکومت بلوچستان ءَ زانت ءِ تالان، دیمروئی ءُ وشھالی ءِ ٹاہ دے اَنت بلے دومی نیمگ ءَ دو سال ءَ چہ برجاہ بی ایس مراگش ءِ اناگاہ بندش ءِ اے ٹاھانی راستی پدر کتگ-

نودربراں گوشتگ کہ بی ایس مراگش بندش ناں تھنا آیانی گرانبھائیں وھد زوال اِنت بلکیں نودربراں یک جوانیں زانت ءَ چہ زبھر کنگ ءِ یک پندلے-

آیاں جار جتگ کہ آوتی زانتی ھکانی ھاتر ءَ ھچ وڑ پُشت کنز نہ بہ ایں ءُ اگاں نودربرانی لوٹ منّگ نہ بیت اَنت گُڑا زھرشانی ءَ دراجکش کن ایں-

کساس چار کلاک ءَ پد ایڈیشنل ڈپٹی کمشنر محمد عمر جمالی ءُ مانیٹرنگ آفیسر کالجز رخشان ڈویژن ھما وھد ءَ سر بیتگ نودربراں گوں گپ ءُ دیوان کتگ- گپ ءُ دیوان ءِ میان ءَ انتزامیہ ءَ نودربر دلجمی داتگ کہ بی ایس مراگش پچ کنگ بیت ءُ زوت کلاسانی درچ دوبر بندات کنگ بنت-

ھمے وڑ تیاب دپی شھر گوادر، کلدان تھسیل سنٹسر گوستگیں سے ماہ چہ آپ نہ بیگ ءَ راج دگانی سر ءَ درتکگ اَنت، زالبول، چُک ءُ کماش شھریاں زھرشانی کنان ءَ کوسٹل ھائی کلدان کراس ھند سر ءَ گاڑیانی روگ ءُ آیگ بند بیتگ-

زھرشانی کنوکانی گوشگ اِنت کہ آ سے ماہ ءَ چہ تُن ءِ ازیت ءِ آماچ اَنت ءُ باز رند ءَ مھکمہ پبلک ہیلتھ انجینئرنگ ءُ دمگی انتزامیہ ءَ چہ آپ دیگ ءِ ارزبندی، بلے تنی وھدے ھچ وڑیں گامگیج زیرگ نہ بیتگ-

زھرشانی کنوکاں تچک کتگ کہ دانکہ دمگ ءَ آپ دیگ نہ بیت آ کوسٹل ھائی وے پچ کنگ ءِ موکل ندے ایں-

زھرشانی ءَ ھواریں راج ھکومت بلوچستان ءُ دمگی انتزامیہ گوادر ءَ زوت گامگیج ءِ لوٹ-