بیگواھیں غنی بلوچ ءُ امجد ءِ کھولانی پریس کانفرنس یل کنائینگ ءِ لوٹ کتگ

بلوچستان ءِ جتاجتائیں دمگ تربت ءُ شال ءَ بیگواھیں غنی بلوچ ءُ امجد علی ءِ کھولاں پریس کانفرنس کنان ءَ وتی مردمانی یل کنائینگ لوٹ کتگ-

شال پریس کلب ءَ غنی بلوچ ءِ کھول ءَ پریس کانفرنس کنان ءَ آئی ءِ یل کنگ ءِ ھاتر ءَ یکرندے پد ءَ واکدار ءُ انسانی ھکانی ادارھاں چہ زوت کاروائی ءِ لوٹ کتگ – کھول ءَ گوشتگ کہ غنی بلوچ 25 مئی 2025 ءَ زورانسری بیگواہ کنگ بیتگ تاں مروچی آئی ءِ ھچ وڑیں ھال دز نہ کپتگ-

کھول ءَ گوشتگ کہ غنی بلوچ ءِ زورانسری بیگواھی ءَ 142 روچ گوستگ، بلے پولیس، انتزامیہ یا آمیدگس تنی وھدے اے نہ گوشتگ کہ کجا اِنت ءُ کئی دست ءَ اِنت- آیاں گوشتگ کہ ما ھرچ آئینی راہ ءَ شتگیں، آمیدگس ءَ شتگیں سرجمیں منانک داتگ اَنت، بلے ھچ ادارہ پٹ ءُ پول دیم ءَ نہ برتگ-

پریس کانفرنس ءَ گوشگ بیتگ کہ ھُزدار ڈسٹرکٹ اینڈ سیشن کورٹ کیس اے بُنیاد ءَ در کنگ بیتگ کہ کھول زورانسری آوار جنی ءِ پٹ ءُ پول پدر نہ کتگ- کھول ءَ اے گپ رد کتگ کہ پٹ ءُ پول کنگ سانمندیں کھول ءِ نہ اِنت ریاستی ادارھانی کار اِنت- آئی ءَ گوشتگ کہ ما تاریک، جاگہ، ءُ ٹرانسپورٹ شرکت ءِ سرجمیں ریکاڈ داتگ اَنت، بلے پولیس ءَ ناں شرکت ءَ چہ سرپدی زرتگ، ناں وئیلجاہ یا کوچ کیمرھانی تامُر لوٹ اِتگ اَنت-

کھول ءِ گوشگ اِنت غنی بلوچ ءِ زورانسری آوار جنی ناں تھنا کھول ءِ جند گم اِنت بلکیں آئین ءِ تچکی ءَ ھلاپ ورزی اِنت- آیانی رِد ءَ آئین ھرچ شھری ءِ زندگی ءُ آجوئی ءِ ھک زمانت ءَ دنت، ءُ کجام مردم ءَ دزگیر کنگ ءَ پد آمیدگس ءِ دیم ءَ پیش کنگ الّمی اِنت-

کھول ءَ دیمتر ءَ گوشتگ کہ چار ماہ ءَ چہ گیش گوزگ ءَ اَبید ناں غنی بلوچ پیش کنگ بیتگ نانکہ گوشگ بیتگ کہ آ کجا اِنت – اے ناں تھنا آئین بلکیں انسانی ھکانی ھم ھلاپ ورزی اِنت-

آیاں آمیدگس، ھکومت، انسانی ھکانی ادارہ ءُ رسانکدر ءَ چہ دزبندی کن ایں کہ آ اے درگت ءَ توار چست بہ کنت ءُ غنی بلوچ ءِ یل کنائینگ ھاتر ءَ جوانیں گامگیجے بہ زور اِیت- کھول ءَ جار جتگ کہ آ وتی دوستناکانی واتری ءَ بے تواری ءَ نہ ننداں-

ھمے وڑ کیچ ءِ دمگ گوگدان ءِ جھمنند امجد علی ء شیر محمد ءِ بیگواھی ءَ یک ماھے ءَ چہ گیش گوستگ بلے تنی وھدے آ یل کنگ نہ بیتگ- کھول ءِ رِد امجد علی پانزدہ ستمبر ءَ پجّار نہ بوتگیں مردماں آوار جتگ ءُ دنیگت ءَ ھچ وڑیں ھال نہ بیتگ-

چہ گوگدان ءَ سیادی داروکیں امجد علی ءِ کھول ءَ تربت پریس کلب ءَ سے شمبے ءَ یک پریس کانفرنسے ءِ میان ءَ تُرس ءُ درد ءِ درشان ءِ کنان ءَ گوشتگ کہ آ گوستگیں سی روچاں چہ گم، تُرس، بے دلجمی ءَ جاوراں زند گوازینگ ءَ اَنت-

کھول ءِ رِد ءَ ما ھچ نزان ایں کہ آوار جنوک کے اَنت ءُ آیانی مول ءُ مراد چی اَنت- آیاں گوشتگ تنی وھدے ھچ کس ءَ ھال نہ کتگ – ما دزبندی کن ایں کہ آ امجد ءَ پہ سلامتی یل بہ کن اَنت-

امجد علی ءِ کھول ءَ پہ بستار بلوچ زالبول، آوار جنوکاں چہ انسانی ہمدردی ءِ رِد ءَ یل کنگ ءِ دزبندی کتگ گوشتگ کہ اگاں کسے ردی ءُ مول ءُ مراد ءِ بُنیاد ءَ آ چست کتگ کم چہ کم کھول ءَ ھال بدے اِت-

آیاں گوشتگ کہ کسے ءَ بیگواہ کنگ ءُ آئی ءِ درگت ءَ ھچ وڑیں سرپدی ندیگ ناں تھنا درکانودی انسانی کارے بلکیں بلوچستان ءِ ھرچ لوگ ءِ گم ءِ بھر جوڑ بیتگ-

کھول ءِ رِد ءَ امجد علی جتاجتائیں نادُراھیانی آماچ اِنت، آئی ءِ دل آپریشن بیتگ ءُ ھمکروچ دوا درمان وارت-

اگاں آئی ءَ دوا درمان نہ رس اَنت گُڑا آئی ءِ جان ءَ سک ھترہ بیت کنت-

پریس کانفرنس ءَ کھول ءَ اِھوالکار، انسانی ھکانی گلاں ءُ ھمگرنچیں ادارھاں چہ دزبندی کتگ کہ آ توار جوڑ بہ بنت ءُ امجد علی ءَ زوت پہ سلامتی یل کنائینگ ءِ ھاتر ءَ کرد پیلو بہ کن اَنت-