بلوچستان ءِ دمگ ھزدار ءِ ھند زھری گوستگیں بازیں روچاں لشکریانی انگر ءَ انت ءُ ھمے وڑ انگت ءَ دمگ ءَ کرفیو برجاہ انت۔ نوکیں ھالانی رد ءَ پاکستانی لشکر ءِ ڈرون اُرش ءِ آسر ءَ پنچ مردم بیران ءُ سَے ٹپیگ بیتگ انت ۔
دمگی مردمانی رد ءَ 5 اکتوبر ءَ زھری ءِ دمگ مقلہ پاس بیل چھاڑی ءَ ڈرون ءُ ھیلی کاپٹر ءِ ھواری ءَ تیرگواری ءُ بمبگوری کنگ بوتگ کہ ایشی ءِ آسر ءَ کم چہ کم 5 مردم جاہ ءَ بیران ءُ 3 ٹپیگ بوتگ اَنت۔
بیران بوتگیں مردمانی تہ ءَ منظور احمد ء عبدلحکیم ءُ آئی ءِ دوئیں چُک ءُ یک براتزتکے، بی بی رحیمہ ءُ آئی ءِ یک چُکے ھوار اِنت۔ وھدے کہ ٹپیگانی تہ ءَ بی بی رحیمہ ءِ جنک ءُ یک چک ھوار انت ۔
زھری گوستگیں لھتے روچاں پاکستانی پوج دمگی آبادیانی سر ءَ اُرش کنگ ءِ ھال پیداک انت- لھتے روچ پیش زھری ءِ دمگ نورگامہ ءَ پوج ءِ تیرگواری ءَ یک ورنایے بیران بیتگ ات-
چم دیستگیں مردمانی رد ءَ ورنا وتی لوگ ءَ چہ درآیگ ءِ وھد ءَ نشانگ جوڑ کنگ بوتگ۔ ٹپیگیں ورنا ھزدار ءَ برگ ءِ وھد ءَ بیران بیتگ-
ایشی ءَ چہ پیسر یک اکتوبر ءَ زھری ءِ دمگ تراسانی ءِ نزیک ءَ ڈرون ءِ اُرش ءَ دو جنین آدم ءَ ھوار سئے مردم بیران ءُ چار سالی زھگ ءَ ھوار پنچ مردم ٹپیگ بوتگ اَنت۔ بیران بوتگیں مردمانی تہ ءَ 40 سالی بی بی آمنہ کہ آ ثناء اللہ ءِ لوگی بیتگ ، 41 سالی لال بی بی ، آ علی اکبر ءِ لوگی بیتگ ءُ 30 سالی محمد حسن ، محمد یعقوب ءِ زھگ ھوار انت ۔
ایشی ءَ چہ پیسر زھری ءِ لوھی دمگاں فوجی بالی گرابانی تراک ءِ آسر ءَ بازیں لس مردم ءِ بیرانی ءِ ھال رس اِتگ انت۔
دمگ ءَ انگت ءَ کرفیو برجاہ انت وھدے کہ دمگ ءَ روھتی نزام ءِ بند سبب ءَ جاور ھال ءِ راستیں ھال ءُ اھوال ءِ گرگ ناسرجمی انت۔