اوگان تالبان ءِ پسھی کاروائی ءَ پنجاہ ءُ ھشت پاکستانی پوجیانی کوش ءِ ٹاہ

اوگانستان ءَ تالبان ھکومت ءِ جارکش ذبیح اللہ مجاھد ءَ ٹاہ داتگ کہ پاکستان ءِ اوگانستان ءِ سر ءَ اُرش ءِ پسّہ ءَ کنگ بیتگیں کاروائیاں پاکستان ءِ پنجاہ ھشت پوجی کارندہ کشتگ وھدے کہ سی ٹپی بیتگ اَنت-

یکشمبے ءِ روچ ءَ کابل ءَ نیوز کانفرنس کنان ءَ ذبیح اللہ مجاھد ءَ ٹاہ داتگ کہ پسّھی کاروائی ءِ میان ءَ پاکستان ءِ بیست چیک پوسٹانی سر ءَ دستیگ کتگ، بلے جنگ ءِ ھلاس بیگ ءَ واتر داتگ اَنت-

پاکستان پوج ءِ نیمگ ءَ ذبیح اللہ مجاھد ءِ اے ٹاہ سر ءَ ھچ وڑیں گپ دیم ءَ نیتکگ – بلے تھکاری وزیر محسن نقوی ءَ گوستگیں شپ ءَ ٹاہ داتگ کہ اوگانستان ءِ نیمگ ءَ کنگ بیتگیں کاروائیانی پسّہ دیگ بیتگ-

ذبیح اللہ مجاھد ءَ میڑانی میان ءَ نُھ تالبان کارندھانی جنگ ءُ ھژدہ ءِ ٹپی بیگ گپ ھم راست کتگ-

ذبیح اللہ مجاھد ءَ بھتام جتگ کہ داعش ءِ سروک پاکستان ءَ اِنت ءُ اے گل انگت ھم پاکستان ءِ استان خیبرپختونخوا ءُ بلوچستان ءَ پُرکار اَنت-

آئی ءِ گوشگ اِنت کہ چہ اوگانستان ءَ داعش ھلاس کتگ بلے پاکستان ءَ اشی ءِ ھیلکاری بُنجل ھست اَنت- دزبندی میان استمانی ادارہ اشی ءِ گامگیج زورگ لوٹ اِیت-

ذبیح اللہ مجاھد ءَ بھتام جتگ کہ اوگانستان ءَ بیتگیں اُرشاں ھم داعش ھمگرنچ بیتگ ءُ وشی ءِ جنگول چہ پاکستان ءَ اتکگ اَنت-

ذبیح اللہ مجاھد ءِ گوشگ اِنت کہ اوگان ءِ ڈنکاری وزیر ءِ تر ءُ گرد ھچ ملک ءِ ھلاپ ءَ نہ اِنت- ھچ ڈیھ ءَ اشی ءِ سر ءَ تُرسگ نہ لوٹ اِیت-