پنچ شمبے ءِ شپ ءَ پاکستانی بالی گراباں اوگانستان ءِ بنجاھی شھر کابل بمب اُرشے کتگ۔ طالبان ءِ انتزامیہ ءَ گوشتگ تراکاں ھچ وڑیں تاوان نہ بوتگ بلے تحریک طالبان پاکستان ءِ سروک نور ولی محسود ءِ بیرانی ءِ ھال سوشل میڈیا ءَ شنگ بوتگ۔
اوگان سرکار ءِ جارکش زبیح اللہ مجاھد ءَ ایکس ءَ گْوشتگ: اے وئیل ءِ پٹ ءُ پول کنگ بوھگ ءَ اِنت بلے تاں انوگ ءَ ھچ وڑیں تاوان ءِ ھال سر نہ بیتگ انت ءُ ھرچی جوان اَنت۔
فرانس ءِ ھال سر کنوکیں ادارہ اے ایف پی ءِ رد ءَ اولی زوریں تراک دمگی وھد ءِ رد ءَ شپ ءِ 9:50ءِ نزیک ءَ بوتگ ءُ دومی تراک ھم لھتیں دمان ءَ پد اشکنگ بوتگ ۔
دومی نیمگ ءَ سوشل میڈیا ءَ پاکستانی فوج ءَ گوں ھمگرنچیں اکاؤنٹاں اے گپ ءِ ٹاپار جتگ کہ کابل ءَ بوتگیں تراک ءَ تحریک طالبان پاکستان ءِ سروک مفتی نور ولی محسود بیران بوتگ۔
پاکستانی سرکار ءِ نیمگ ءَ چہ ھچ وڑیں اُرش ءِ سرکاری راستی نہ بوتگ انت۔ اسلام آباد ءَ گوستگیں وھداں پاکستان ءِ نیمگ ءَ بوتگیں گمانی اُرشانی بابت ءَ ھم ھچ گپ نہ جتگ۔
اوگانستان ءِ نامداریں اھوالکار بلال سروری ءَ ایکس ءِ سر ءَ نبشتگ: ”گشگ بوھگ ءَ اِنت کہ کابل ءِ بمب تراک ءَ ٹی ٹی پی ءِ ھاسیں سروک نشانگ جوڑ کنگ بوتگ اَنت۔“
بلال سروری ءِ رد ءَ اے بمبتراک ھما وھد ءَ بوتگ کہ اوگانستان ءِ ھزاروکی سرکار ءِ دری کارانی وزیر مولانا امیر خان متقی بھارت ءِ تر ءُ تاب ءَ اِنت۔
پنچ شمبے ءُ جمعہ ءِ روچ ءَ 12 نیم ءَ چہ سوشل میڈیا ءِ سر ءَ یک نا پدریں آڈیو پیگامے ھم شنگ ءُ تالان اِنت کہ ایشی ءِ تہ ءَ یک مردمے ءِ گپ گوشدارگ بیت کہ آ (مبینہ) مفتی نور ولی محسود اِنت ءُ مرچی 9 اکتوبر ءَ پاکستان ءِ قبائلی دمگاں جاڑیگ انت ءُ آئی ءِ کُشگ ءِ ھال نیست انت-
اے آڈیو پیگام انگت ءَ ٹی ٹی پی ءِ نیمگ ءَ چہ پدر نہ بوتگ ءُ نہ کہ ٹی ٹی پی ءَ مفتی نور ولی محسود ءِ بابت ءَ بیان شنگ کتگ۔
سوشل میڈیا ءِ سر ءَ بازیں مردماں تراک ءِ توار ءِ اشکنگ ءُ ڈرون ءِ گندگ ءِ ھال داتگ۔
اے ایف پی ءِ اھوالکار ءَ دیستگ کہ بنجاھی شھر ءِ دمکانی تہ ءَ سیکورٹی فورسز ءِ ھال ءُ اھوال ءُ گاڑیانی پٹ ءُ پول کنگ دیستگ۔ موبائل فون ءِ سروس ھم بازیں میتگاں بند بوتگ انت۔
برطانیہ ءِ ھال سرکنوکیں رائٹرز ءِ رپورٹ ءِ رد ءَ اولی تراک عبدالحق اسکوائر دمگ ءَ بازیں وزارت ءُ نیشنل انٹیلی جنس ایجنسی ءِ کارگسانی نزیک ءَ بوتگ ءُ کابل ءِ نندوکاں شھر ءِ شہر نو ءِ میتگ ءَ دگہ تراکے ھم اشکتگ کہ ایشی ءِ پدر کنگ نہ بوتگ۔
اوگانستان ءِ پیسریگیں امریکی سفیر زلمی خلیل زاد ءَ وتی ایکس اکاؤنٹ ءِ سر ءَ نبشتگیں پیگام ءِ تہ ءَ ھم جُست کُتگ کہ آیا پاکستان ءَ کابل ءَ بمب تراک کتگ کہ ایشی ءِ تہ ءَ ٹی ٹی پی ءِ مفتی نور ولی ءِ بیرانی ءِ گمان اِنت۔
پیگام ءَ گیش گْوشگ بیتگ کہ بنداتی ھال رد بوت کن اَنت بلے جنگ ءِ چاگرد جوڑ کنگ بوتگ۔
تراک ءِ تہ ءَ مفتی نور ولی ءِ بیرانی ءِ انگت ءَ کابل ءُ پاکستانی سرکار ءَ اے گپ ءِ پدرائی نہ کتگ ءُ ٹی ٹی پی ءِ انگت ءَ آزاتیں رنگ ءَ اے گپ ءِ پدرائی نہ بوتگ۔
پاکستان ءَ فوج ءِ سر ءَ بازیں اُرشانی پد ءَ ٹی ٹی پی ءِ یک مستریں سروک ءِ کوش ءُ کابل ءِ سر ءَ بالی اُرشانی ھال شنگ بوھگ ءِ گمان اِنت۔
چار شمبے ءِ روچ ءَ پاکستان ءِ قبائلی ضلع اورکزئی ءَ جنگولانی تیرگواری ءَ دو افسر ءَ ھوار 11 فوجی کارندہ بیران بیتگ اَنت ءُ پنچ شمبے ءِ روچ ءَ جعفر ایکسپریس ءِ سر ءَ لھتے وھد ءِ تہ ءَ سیمی رند ءَ اُرش کنگ بوتگ۔
گوستگیں لھتیں سالانی تہ ءَ خیبر پختونخوا ءُ بلوچستان ءِ اُستانی تہ ءَ پاکستانی لشکر ءِ سر ءَ اُرش گیش بوتگ اَنت کہ اسلام آباد ءِ گْوشگ اِنت کہ اے اُرش تحریک طالبان پاکستان ءُ بلوچ جنگولی گل بی ایل اے ءِ نیمگ ءَ کنگ بنت کہ آیاں بازیں وئیلانی زمہ واری زرتگ انت۔
پاکستان ءِ بھتام اِنت کہ اے گلانی سروک اوگانستان ءَ بنجاہ دار اَنت ءُ لوٹ کتگ کہ کابل ءَ اے جنگولیں گل ءُ آھانی سروکانی ھلاپ ءَ کارروائی بہ کنت۔
بلے کابل ءِ اوگان طالبان انتظامیہ اسلام آباد ءِ نیمگ ءَ اے بھتاماں رد کنگ ءَ انت۔