بلوچستان ءَ پاکستانی پوج ءِ زوراکی ھمکروچ گیش بوان اَنت یک بیگواھیں مردمے ءِ لاش دزکپتگ، چار مردم بیگواہ، سے یل کنگ بیتگ اَنت

بلوچستان ءَ اے وھد ءَ بلوچ چُکچینی گوں تُرندی ءَ برجاہ ءَ اِنت ھمکروچ بلوچانی ورنایانی تیرسُپتگیں لاش، آوار جنگ ءُ بیگواہ کنگ یکشل ءَ برجاہ ءَ اِنت ھمے دو ماھانی تہ ءَ کساس دو دزن ءَ گیش بیگواھیں مردمانی لاش دور دیگ بیتگ اَنت بلوچستان ءِ جتاجتائیں دمگ، آواران، ھُزدار، کیچ، بارکھان ءَ دروگیں میڑاں بیگواھیں مردم کُشتگ ءُ دور داتگ اَنت-

گیشیں ھالانی رِد ءَ کیچ ءِ تھسیل بلیدہ ءَ ھمے یکیں ھپتگ ءَ اے سیمی بیگواھیں ورنا ءِ لاش اِنت کہ دزکپگ ءَ اِنت-

دی بلوچستان پوسٹ ءَ دزکپتگیں ھالانی رِد ءَ گوستگیں شپ ءَ پاکستانی پوج ءُ سرکاری پلامرزی ٹولی ءَ یوسف ء عبدین چہ کڈکی کوہ ءَ ڈیوٹی ءِ میان ءَ چست کتگ ءُ وتی ھمراھی ءَ برتگ پد ءَ مروچی آئی ءِ تیرسُپتگیں لاش دور داتگ-

دمگی مردماں گوشتگ کہ بازیں دھکاں چہ بلوچ تُرس ءِ ساھگ ءِ چیر ءَ زند گوازینگ ءَ لاچار اَنت- زورانسری آوار جنی، درکانودی کوش بلوچستان ءِ تھلیں راستی یے جوڑ بیتگ- یوسف عبدین کوش ھچ چُش جتا نہ اِنت بلکیں بلوچ راج ءِ ھلاپ ءَ ریاستی زوراکی ءُ کُشت ءُ کوش ءِ مھمکیں بھرے-

زانگ بہ بیت ھمے ھپتگ ءَ چہ بلیدہ ءَ دگہ دو ورنایانی لاش دزکپتگ اِت اَنت آ پاکستانی پوج ءُ دمگی سرکاری پلامرزی ٹولی ءِ دست ءَ بیگواہ کنگ بیتگ اِت اَنت-

ھمے وڑ کراچی، واشک ءُ کیچ ءَ ایڈووکیٹ ءَ ھوار چار مردم آوار جنگ ءُ بیگواہ کنگ بیتگ اَنت-

گیشیں ھالانی رِد ءَ چہ واشک ءَ گوستگیں روچ ءَ ورنائیں ایڈووکیٹ حنیف بلوچ زورانسری بیگواہ کنگ بیتگ-

کھول ءِ رِد ءَ ایڈووکیٹ حنیف بلوچ پاکستانی پوج ءِ کارندھاں آئی ءِ لوگ ءَ چہ ناگ واشک آوار جنگ ءَ پد ناشناسیں جاھے ءَ برتگ –

کھول ءِ گوشگ اِنت کہ آیاں تنی وھدے ھچ وڑیں سرپدی دیگ نہ بیتگ، کھول ءُ چاگردی مردماں اے گامگیج ایر جنان ءَ ایڈووکیٹ حنیف بلوچ ءِ پہ سلامتی یل کنائینگ لوٹ کتگ-

ھمے وڑ گوستگیں شپ ءَ کیچ ءِ دمگ چہ مند ءَ پاکستانی پوج ءَ نصرت سید محمد جھمنند کوہ پشت ءُ عالم نصیر آوار جتگ ءُ بیگواہ کتگ اَنت-

بلوچستان ءَ اَبید کراچی ءَ ھم جھمنندیں بلوچ مُھر نہ اَنت ھمے وڑ گوستگیں روچ ءَ کراچی ءِ دمگ چہ نوکیں لین لیاری ءَ رینجرز ءِ کارندھاں زاکر علی ء محمد ابراھیم آوار جتگ ءُ بیگواہ کتگ-

زاکر علی ءِ آوار جنی ءِ گپ بلوچ یکجھتی کمیٹی ءَ راست کتگ ءُ آوار جنی ءِ ھال شنگ کتگ-

دومی نیمگ ءَ چہ کیچ ءَ بیست ھشت مارچ 2025 ءَ چہ آپسر ءَ بیگواہ کنگ بیتگیں عبدالصمد ء میار شش ماہ ءَ پد گوستگیں روچ ءَ دیم ءَ آرگ بیتگ-

ھمے وڑ مروچی جمعہ ءِ روچ ءَ کیچ ءِ جتاجتائیں دمگاں چہ بیگواہ کنگ بیتگیں دو مردم عبدالرحمان ء سخی داد جھمنند ڈڈے دشت اے وھد ءَ گوکدان، دو ھپتگ ءَ پد ءُ احمد ء غلام محمد جھمنند مند چل شش روچ ءَ پد یل بیتگ-

سئیں مردم پاکستانی پوج ءَ آوار جتگ ءُ وتی ھمراھی ءَ برتگ اَنت چریشی ءَ پد آ بیگواہ بیتگ اَنت-

دمگی انتزامیہ ءَ سئیں مردمانی یل بیگ ءِ گپ راست کنان ءَ گوشتگ کہ آ وتی لوگ ءَ واتر سر بیتگ اَنت-