بلوچستان ءَ زورانسری آوار جنی ءِ درچ یکشل ءَ برجاہ، اسلام آباد نندانک ءَ ھپتاد یک روچ سرجم

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت دگہ شش مردم آوار جنگ ءُ بیگواہ کنگ بیتگ اَنت وھدے کہ اسلام آباد ءَ زھرشانی نندانک ھپتاد یک روچ سرجم-

بلوچستان ءِ جتاجتائیں دمگ شال، پنجگور ءُ مچ ءَ شش مردم آوار جنگ ءُ بیگواہ کنگ بیتگ اَنت-

اِھوالکار ءِ رِد ءَ شال ءَ بروری دمگ ءَ بیڑانی میان ءَ کیچ ءِ سے نودربر بیگواہ کنگ بیتگ اَنت – بیگواہ کنگ بیتگیں نودربرانی تہ ءَ نوروز ء منظور جھمنند سنگ آباد، کسانی سالی ئیں نودربر دُرجان جھمنند سنگ آباد، شھبیک ء ماسٹر طاہر جھمنند شاپک ڈانڈل ھوار اَنت-

دمگی اِھوالکار رِد ءَ بیڑ شپ ءِ بے وھد ءَ بیتگ تنی وھدے آیانی درگت ءَ ھچ وڑیں ھال نیست-

ھمے وڑ پنجگور ءِ دمگ چہ خدابادان ءَ پاکستانی پوج ءَ یک لوگے ءِ سر ءَ بیڑبرتگ ڈاکٹر عبدالوحید ءُ آئی ءِ چُک عرفان آوار جتگ اَنت-

ھمے وڑ چہ مچھ ھالانی رِد ءَ پاکستانی پوج ءَ چہ مچھ بازار ءَ واتر آیگ ءَ نور بخش ء شاہ محمد سمالانی ایف سی چیک پوائنٹ ءَ دارگ ءَ پد آوار جتگ ءُ وتی ھمراھی ءَ برتگ چریشی ءَ پد آ دیم ءَ نیتکگ-

اِھوالکار ءِ رِد ءَ نوربخش دمگی اشکر کھن ءَ کار ءَ بیتگ ءُ آوار جنی ءِ وئیل گوستگیں ماہ بیست پنچ اگست ءَ بیتگ-

دومی نیمگ ءَ بلوچ یکجھتی کمیٹی ءِ بندیگیں رھشون ءُ بیگواھیں مردمانی یل کنائینگ ءِ ھاتر ءَ اسلام آباد ءَ زھرشانی نندانک ھپتاد یک روچ سرجم بیتگ-

مروچی ھیومن رائٹس کمیشن آف پاکستان (HRCP) ءِ چیئرپرسن منیزہ جھانگیر، افراسیاب خٹک، فرحت اللہ بابر ءُ سادیہ بخاری ءَ ھوار دگہ مردماں زھرشانی نندانک بُنجل ءَ اَتکگ اَنت- آیاں کھول ءَ چہ دزبندی کتگ کہ آ بُنجل ءَ ھلاس بہ کن اَنت وتی جُھد ءَ دگہ یک دروشمے ءَ دیم ءَ برگ ءَ بہ جیڑ اَنت- آیانی گوشگ اِنت کہ اے آسر نہ اِنت بلکیں انساپ ءِ توار چست کنگ ءِ یک نوکیں پڑ ءِ بنداتی اِنت-

آیاں گوشتگ ھپتاد یک روچاں چہ پیرزالیں مات ءُ نُنکیں چُک بُنجاھی شھر ءِ دگانی سر ءَ نشتگ اَنت، بلے ریاست تاں انگت آیانی پریاتانی سر ءَ کور ءُ کر جوڑ بیتگ- کھول ءِ نیمگ ءَ چہ گوشگ بیتگ کہ ما شور ءَ پد وتی دیم کار ءَ شمارا سرپد کن ایں – آئی ءَ اے جُھد ءِ ھمراھداری کنوکانی منت گپتگ ءُ اُمیت وار بیتگ کہ اے جُھد ءَ یکشل ھمراھداری کن اَنت-

آیاں گوشتگ کہ یات بہ کن اِت راجدپتر ءَ الّم نبشتہ کنگ بیت بُنجاھی شھر اسلام آباد ءَ بلوچاں گوں کجام رویشگ کتگ، آیانی درد کجام وڑ سر گوز کتگ اَنت ءُ ریاست ءَ کجام وڑ آیانی توار ءِ اش کنگ نہ لوٹ اِتگ- بلے بلوچ اے ھچبر بیھال نہ بیت ءُ آیانی گھگیری برجاہ بیت-