ماھو ءِ دیستگیں واب
نبشتہ کار: نگرہ بلوچ
دی بلوچستان پوسٹ
ھر روچ مانشانی ساھگ ءَ زندگی کنگ، جنگل ءُ گیاباناں وتی دوستیں مردماں گار کنگ، دل ءَ درد ءُ گمانی گرانیں بار ءَ گوں زندگی کنگ چینچو گران اِنت گندئے؟ اے درداں ھما زانت ءُ مار اِت کنت کہ آ وت ھمے وڑیں زندے گوازینگ ءَ اِنت۔ ماھو ھما مردماں چہ یکے اَت کہ اے آس ءَ رُوک اَت۔
ماھو، انچیں چاگردے ءَ رُدگ ءُ مزن بوگ ءَ اَت گُش ئے آ میتگ ءُ بازار یک جنگی پٹّ ءُ میدانے اَت۔ آ تُرس آماچ اَت۔ آ تُرس ءُ بیم ءِ ساھگ ءَ وتی شپاں سُھب کنگ ءَ اَت۔ اے تُرس وتی نزیکیں مردمانی رپتن ءِ تُرس اَت۔ اے تُرس آیانی گار ءُ بیگواھی ءِ تُرس اَت۔ پرچا کہ آ یک اَنچیں سرڈگارے ءَ نشتگ اَت کہ آ دری راجانی گُلام اِنت۔ کبزہ گیر ھر رُوچ چو شاھین ءَ اِیر دنت یک بلوچ پُسگے اَچ آیاں پُل اِیت ءُ برے آیانی تیر سُپتگیں لاشاں ھم کوہ ءُ جنگلاں دور دَنت۔
ماھو ءِ میتگ ھالی بوان اَت ءُ آئی ءِ چپ ءُ چاگرد ءَ کبرانی بازار مزن بوان اَت۔ ھما مردم کہ ھر روچ آئی ءِ دیم ءَ اِت اَنت یک پہ یک ءَ گار ءُ بیگواہ بوان اِت اَنت۔
جنگانی موسماں گپتگیں زندگی ءَ آئی ءِ کسانی پچ گپتگ اِت ءُ یک دردے داتگ اَت ،آ گندگ ءَ اَت کہ مردم گار بوگ ءَ اِت اَنت ءُ پد ءَ دوبر واتر نہ بوگ ءَ اِت اَنت، ھر بیگواھی یک گِسے ءَ ویران کنگ ءَ اَت ،بس پُشت ءَ درد، گم، ارس، رَنج ءُ یات ءُ گیراں پشت گیچگ ءَ اَت۔ ماھو ،اے درد ءُ گماں وتی اندر ءَ جاہ دیگ ءَ اَت انچو گوش ئے کہ سرجمیں زمین ماھو ءِ ھاندان اِنت ءُ سرجمینانی درد ماھو ءِ درد اَنت۔ ھر وھد آئی ءَ ھمے گم تہ ءَ وران اَت کہ باندا دگے یکے گار ءُ بیگواہ کنگ مہ بیت دگہ یکے ءِ تیر سُپتگیں جون مارا سوگات کنگ مہ بیت۔
تھاریں شپانی تہ ءَ آئی ءِ ھمت، ھوسلہ ءُ اُمیت وتکشی کنگ ءَ اِت اَنت ءُ ھر بام ءِ ٹک ءَ آ یکرندے پد ءَ وت ءَ یک نوکیں اُمیتے زندگ کنگ ءَ ات۔ آ نبشتہ کنگ ءَ اَت ،آ گپ کنگ ءَ ات، آ اَنچیں سرزمینے ءِ واب ءَ گندگ ءَ اَت کہ اود ءَ گونڈل گریوگ ءَ نہ اِت اَنت بلکیں وشی ءُ کندگاں گوں زندگی کنگ ءَ اَنت۔ مات وتی سالونکیں بچّانی مرگ ءِ ھال ءِ اِش کنگ ءِ ودار ءَ نہ اَنت، بلکیں وتی بچّانی سیر ءُ وشی ءِ ودار ءَ انت ۔
سرجمیں واب ماھو ءِ تاکت ءُ ھوسلہ بوگ ءَ اَت اَنت، ماھو ءِ ھاموشی ماھو ءِ توار اَت کہ وتی ھاموشی ءِ زبان ءَ گپ کنگ ءَ اَت۔
اے تھنا ماھو ءِ کسہ نہ اِنت بلکیں ھما سرزمیں ءِ کُلیں مردمانی کسہ اِنت، ھما راج ءِ کسہ انت کہ ھر روچ کبزہ گیریں ریاست ءِ زلم ءُ زوراکیانی دیمپان اِنت بلے ھمے رنج ءُ گم، ھمے زُلم ءُ زوراکی ءِ موسمانی تہ ءَ جد ءُ جُھد یک اُمیتے اَت، اُمیت جنگ ءَ چہ باج برگ ءِ، اُمیت کہ آجوئی ءِ نشانی اَت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-