شال، اسلام آباد ءَ بلوچ کھولانی زورانسری آوار جنی درکانودی دزگیریانی ھلاپ ءَ زھرشانی، پنجگور ءَ یک مردمے آوار جنگ بوتگ

اسلام آباد ءُ شال ءَ بلوچ کھول ریاست پاکستان ءِ نیمگ ءَ چہ زورانسری آوار جنی ءُ بلوچانی ءُ بی وائی سی ءِ سروکانی دزگیری ءِ ھلاپ ءَ زھرشانی برجاہ-

بلوچستان ءَ زورانسری آوار جنی ءِ ھلاپ ءَ وائس فار بلوچ مسنگ پرسنز ءِ برجاہ دراجکشیں زھرشانی بُنجل ءَ شال پریس کلب ءِ دیم ءَ پنچ ھزار نُھ سد چل ءُ چارمی روچ ءَ برجاہ بیتگ-

گل ءِ لوٹ اِنت کہ زورانسری بیگواھیں بلوچاں دیم ءَ آرگ آمیدگس ءَ پیش بہ کن اِت – بُنجل ءِ جتاجتائیں پڑ ءِ مردم اتکگ ءُ یکجاھی درشان ءِ کتگ گوشتگ کہ ریاست زورانسری آوار جنی ءَ بلوچستان ءِ مردماں تُرس آماچ کنگ ءِ جُھد ءَ اِنت بلے زورانسری آوار جنی ھچ جیڑہ ءِ گیشینگ نہ اِنت- ھکومت ءَ لوٹ اِیت کہ آ سرجمیں زورانسری بیگواھیں مردماں دیم ءَ بیار اِیت ءُ آمیدگس ءَ پیش بہ کنت-

ھمے وڑ اسلام آباد ءَ بلوچ کھولانی نندانک ءَ شست ھپت روچ سرجم بیتگ-

آیانی لوٹ اِنت کہ بلوچ یکجھتی کمیٹی ءِ رھشوناں زوت پہ سلامتی یل بہ کن اَنت ءُ بلوچستان ءَ زورانسری آوار جنی ءِ درچ ءَ بند بہ کن اَنت-

اے درگت ءَ زھرشانی کنوکانی گوشگ اِنت کہ شست ھپت روچ گوستگ ءُ مات، چُک، جنین ءُ کماش تُرندیں مولم، تُرندیں ھور، گرم ءُ اکتدار ءَ نشتگیں کرّانی بے تواری ءَ اوپار کنگ ءَ اَنت- ناں ھکومت ءُ نانکہ گپ دیوانے رسانکدر کسے ءَ جُرت کتگ کہ آ انساپ ءِ توار ءَ گوش بدار اَنت-

زھرشانی کنوکاں یکرندے پد ءَ جار جتگ کہ آ وتی زھرشانی ءَ پُرایمنی ءَ گوں برجاہ دار اَنت، اد ءَ آیانی رھشون ءُ بیگواھیں مردمانی یل کنگ ممکن بہ بیت-

ھمے وڑ دومی نیمگ ءَ شمبے ءِ روچ ءَ پنجگور ءِ تھسیل پروم ءَ پاکستانی پوج ءَ بی ایل اے ءِ مجید بریگیڈ ءِ پدائی گوھر بلوچ پنّام ءِ گزین ءِ لوگ سر ءَ پوج ءِ بیڑبرتگ ءُ کھول لَٹ ءُ کُٹانی نشانگ کتگ اَنت-

اے میان ءَ آئی ءِ ناکو کریم جان آوار جتگ ءُ ناشناسیں جاھے ءَ برتگ-

زانگ بہ بیت کہ پدائی گوھرام بلوچ پنّام ءِ گزین گوستگیں روچاں دشت ءَ بلوچ لبریشن آرمی ءِ نیمگ ءَ بیتگیں پاکستانی پوج ءِ سر ءَ یک مزنیں اُرشے ھوار اِنت-

زانگ بہ بیت گوستناک ءَ ھم پاکستانی پوج ءَ بلوچ آجوئی لوٹوکانی لوگانی سر ءَ بیڑبرتگ ءُ آیانی سیاد زورانسری آوار جنی ءِ نشانگ کتگ اَنت-