بلوچستان ءِ دمگ خضدار ءِ ھند دو تلوار ءَ ناشناسیں مردماں پاکستان پیپلز پارٹی ءِ کلانیں رھشون آغا شکیل احمد درانی ءُ مسلم لیگ ن ءِ سینیٹر آغا شازیب درانی ءِ لوگ ءِ سر ءَ دزبمب اُرش کتگ ءُ 7 گارڈ ٹپیگ بوتگ انت۔
پولیس ءِ سینئر سپرنٹنڈنٹ خضدار شہزادہ عمر عباس بابر ءَ دمگی اھوالکاراں گوں تران کنان ءَ گشتگ کہ اے اُرش ءَ لوگ ءِ سر ءَ ایریں سیکورٹی واستا ھستیں ھپت گارڈ ٹپیگ بوتگ اَنت۔
آئی ءَ گوشت کہ ٹپیگیں مردم درمانی ءَ خضدار ٹیچنگ ہسپتال ءَ سر کنگ بوتگ انت، اود ءَ گشگ بوھگ ءَ انت کہ آھانی جاور ھال چہ ھترہ ءَ در انت۔
آئی ءَ گْوشتگ کہ تراک ءَ چہ پد پولیس ءُ دگہ فورسز ءَ دمگ انگر کتگ ءُ اُرش کنوکانی پٹ ءُ پول بندات کتگ ۔ ایس ایس پی ءِ رد ءَ وئیل جاہ ءَ چہ سبوت یکجا کنگ بوھگ ءَ انت ءُ ارش کنوک زوت کانون ءِ تک ءَ آرگ بنت ۔
دومی نیمگ ءَ بلوچستان ءِ سر وزیر میر سرفراز بگٹی ءَ خضدار ءَ پیپلز پارٹی ءِ سروک آغا شکیل دُرانی ءِ گس ءِ سر ءَ دستی بم ءِ اُرش اپسوزی لیک اِتگ۔
بلوچستان ءِ سر وزیر میر سرفراز بگٹی ءَ گشتگ کہ اے وئیل ءِ ترندیں پٹ ءُ پول بندات کنگ بوتگ ءُ جرمدار گرگ ءُ کانون ءِ تک ءَ آرگ بنت۔