بلوچستان ءَ زورانسری آوار جنی ءِ درچ برجاہ، کراچی ءُ اسلام آباد ءَ کھولانی نندانک ھم برجاہ

بلوچستان ءَ زورانسری آوار جنی ءِ درچ اوشتگ ءِ نام ءَ نزانت –

بلوچستان انسانی ھکانی ءُ بلوچ بیگواھیں مردمانی یل کنائینگ ءِ ھاتر ءَ توار چست کنگ کنوکیں گلانی ریاستی زوراکی ءُ زورانسری آوار جنی ءِ ھلاپ ءَ یکشل ءَ توار چست کنگ ءَ اَنت ءُ آ لوٹ ءَ ھم کنگ ءَ اَنت زورانسری آوار جنی ءِ درچ بند کنگ بہ بیت بیگواھیں مردم یل کنگ بہ بنت-

ھمے وڑ مروچی چہ شال ءَ پاکستانی پوج ءَ مولانا خلیل اللہ شھاب آوار جنگ ءَ پد ناشناسیں جاھے ءَ برتگ-

ھالانی رِد ءَ شپ ءِ وھد ءَ سی ٹی ڈی ءَ الم دین ءِ لوگ ءِ سر ءَ بیڑبرتگ ءُ مولانا خلیل اللہ شھاب دزگیر کتگ ءُ وتی ھمراھی ءَ برتگ چریشی ءَ پد آئی ءِ درگت ءَ ھچ وڑیں ھال نیست-

مولانا خلیل شھاب ءِ آفیشل پیچ سر ءَ یک پوسٹے ءَ گوشگ بیتگ کہ پاکستانی پوج، سی ٹی ڈی ءِ کارندھانی مزنیں کچے ءَ دمگ انگیر ءَ کتگ ءُ بیڑبرتگ، اے میان ءَ کسے ءَ نزیک ءِ روگ یا جُست کنگ ءِ اجازت دیگ نہ بیتگ، گوشگ بیگ ءَ اِنت کہ پوج کارندھاں مولانا آئی ءِ کمرہ ءَ چہ چست کتگ ءُ برتگ-

واکدار ءَ اے درگت ءَ ھچ وڑیں ھال شنگ نہ کتگ-

ھمے وڑ کراچی پریس کلب ءِ ڈن ءَ زورانسری آوار جنی ءِ ھلاپ ءَ زھرشانی بُنجل ءَ سے شمبے ءِ روچ ءَ سی ششمی روچ ءَ پُترتگ – ھور ءَ اَبید زالبول، چُک ءُ کماش وتی دوستناکانی یل کنائینگ ءِ ھاتر ءَ اوشتاتگ اَنت-

بُنجل ءَ ساڑی بیگواھیں ورنا زاھد علی بلوچ ءِ پت عبدالحمید بلوچ ءَ رسانکدر ءَ تران کنان ءَ گوشتگ کہ منی چُک یک مھنتی یے ورنایے، کہ وتی کھول ءِ کوپگ جوڑ بیتگ، بلے مروچی آ مارا چہ پچ گرگ بیتگ- اگاں آئی ءِ سر ءَ کجام وڑیں بھتامے ھست گُڑا آمیدگس ءَ پیش بہ کن اِنت- کانود درستانی واستا یک ھساب بہ بیت ءُ کسے ءَ درکانودی سزا دیگ ءِ ھک نیست-

انسانی ھکانی کارکنانی رِد ءَ کراچی ءِ جتاجتائیں دمگاں چہ بازیں بلوچ ورنایے بیگواہ ءَ اِنت کہ آیانی تہ ءَ شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت – اے درست گریبیں لوگاں گوں سیادی دار اَنت، بلے اشانی زورانسری آوار جنی کھول ءَ سک دلسیاھیانی دیمپانی کتگ اَنت-

کھول ءِ رِد ءَ زورانسری آوار جنی ناں تھنا انسانی ھکانی ھلاپ ورزی اِنت بلکیں آئی ءَ چہ مالی جاور ءِ تباہ کنگ اِنت- لوگانی لاپ دیوکیں ورنایانی ساڑی نہ بیگ کھولاں دو وھد ءِ نان واستا تلوسگ ءَ اَنت ءُ بازیں مات وتی چُکانی گستائی چہ نادُراہ جوڑ بیتگ اَنت-

زھرشانی بُنجل ءَ نشتگیں کھولاں گوشتگ آ وتی دوستناکانی یل کنائینگ ءَ تاں بُنجل ءَ یل نہ کن ایں ءُ میان اُستمانی ھکانی گل چہ کمک ءِ لوٹ ءُ گامگیج زیرگ ءِ لوٹ کن ایں-

ھمے وڑ اسلام آباد ءَ بیگواھیں مردمانی ءُ بی وائی سی ءِ بندیگیں سروکانی کھولانی زھرشانی نندانک ءَ مروچی پنجاہ ششمی روچ ءَ ھم برجاہ-

آیانی گوشگ اِنت کہ مروچی مئے نندانک ءَ پنجاہ شش روچ سرجم بیتگ بلے نہ دلگوش کنوکیں ھکومت ءُ آئی ءِ مردمانی بے تواری برجاہ ءَ اِنت-

آیاں گوشتگ کہ مئے زھرشانی نندانک تاں ھما روچ ءَ برجاہ دانکہ بی وائی سی ءِ سروک ءُ بیگواھیں دوستناک یل کنگ نہ بنت-