بلوچستان ءَ زورانسری آوار جنی دْرچ ءُ اسلام آباد کراچی ءَ زھرشانیانی دْرچ یکشل ءَ برجاہ ءَ اَنت

بلوچستان ءَ جتاجتائیں دمگاں زورانسری آوار جنی ءِ دْرچ یکشل ءَ برجاہ ءَ اِنت ءُ دومی نیمگ ءَ زورانسری آوار جنی ءِ ھلاپ ءَ اسلام آباد ءُ کراچی ءَ کھولانی زھرشانی نندانکانی دْرچ یکشل ءَ برجاہ ءَ اِنت-

گیشیں ھالانی رِد ءَ بلوچستان ءِ دمگ کیچ ءِ جتاجتائیں دمگاں ھپت مردم پاکستانی پوج ءَ آوار جتگ ءُ بیگواہ کتگ اَنت – دمگی اِھوالکار ءُ کھول ءِ رِد ءَ اے وئیل گوستگیں روچاں تربت ءُ زامران ءِ دمگ ءَ بیتگ اَنت-

چمّگدانی ءُ سیادانی گوشگ اِنت کہ صادق ء نور اللہ، مسلم ء سخی داد ءُ کلیم ء نور اللہ، بلیدہ ءِ جھمنند اَنت، یکشمبے ءِ شپ ءَ تربت ءِ دمگ چہ آبسر ءَ پاکستانی پوج ءَ آوار جتگ اَنت – آیانی گوشگ ءِ رِد ءَ آوار جنگ ءَ پد اے مردم ناشناسیں جاھے ءَ برتگ اَنت کہ انگت بیگواہ اَنت ھچ وڑیں ھال دز نہ کپتگ-

ھمے وڑ زامران ءِ دمگ چہ نوانو ءَ دگہ چار مردم، مھران ء شے قلندر، جیئند ء محمد جان، علی ء نسرت ءُ ارشاد ء رحیم بلوچ ھم پاکستانی پوج ءَ گوستگیں روچ ءَ آوار جنگ ءَ پد بیگواہ کتگ اَنت-

کھول ءِ گوشگ اِنت آ آوار جنگ ءَ اَبید تنی وھدے دمگی انتزامیہ یا دگہ سرکاری ادارہ نیمگ ءَ ھچ وڑیں دزگیری پدر کنگ نہ بیتگ-

کراچی ءَ زورانسری آوار جنی ھلاپ ءَ زھرشانی بُنجل ءَ دوشمبے ءِ روچ ءَ سی پنچ روچ سرجم بیتگ-

کراچی پریس کلب ءِ ڈن ءَ زھرشانی بُنجل ءَ ھوار بیگواھیں ورنا زاھد علی بلوچ ءِ پت عبدالحمید بلوچ ءَ رسانکدر ءَ چہ تران کنان ءَ گوشتگ کہ آ جگر ءِ نادُراھی ءِ آماچ اِنت بلے چُک ءِ یل کنائینگ ءِ ھاتر ءَ زھرشانی کنگ ءَ لاچار اِنت-

آئی ءَ گوشتگ کہ زاھد ءَ چُشیں گناھے کتگ آئی ءَ آمیدگس ءَ پیش کن اِت ءُ چو آئی ءَ بیگواہ مہ کن اِت-

عبدالحمید بلوچ ءَ گوشتگ کہ انسانی ھکانی کارکنانی رِد ءَ کراچی ءِ جتاجتائیں دمگاں چہ بازیں بلوچ ورنایے بیگواہ ءَ اِنت کہ آیانی تہ ءَ شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رحمان بلوچ ھوار اَنت – کھول ءِ گوشگ اِنت کہ زورانسری آوار جنیاں اے کھول سک زھنی زور ءُ مالی جیڑھاں چہ دیمپان اَنت-

دومی نیمگ ءَ اسلام آباد ءَ برجاہ زھرشانی وتی پنجاہ پنچمی روچ ءَ پُترتگ اود ءَ چُک ءُ کماش ءُ زالبول تُرندیں سارتی، ھور ءُ گرم وتی بیگواھیں دوستناکانی یل کنائینگ ھاتر ءَ زھرشانی ءَ اَنت- کھول ءِ گوشگ اِنت کہ اینچو روچ ءِ گوزگ ءَ اَبید نہ ھکومت ءَ ھال کتگ نانکہ بُنجاھی رسانکدراں آیانی لوٹ دیم ءَ آورتگ اَنت-

زھرشانی ءَ ھوار زھرشانی کنوکاں گوشتگ کہ آ وتی دوستناکانی یل کنائینگ ءَ تاں پُرایمنیں جُھد ءَ برجاہ دار ایں- آیاں گوشتگ کہ ھکومت ءُ ریاستی ادارھاں چہ لوٹ کتگ کہ بلوچ یکجھتی کمیٹی ءِ دزگیریں رھشوناں ھوار سرجمیں بیگواھیں مردماں دیم ءَ بیار اِت ءُ آیانی ھلاپ ءَ اگاں کجام وڑیں بھتامے ھست گُڑا آمیدگس ءَ پیش بہ کن اِت-