کراچی، شال ءُ اسلام آباد ءَ زھرشانی نندانکانی درچ یکشل ءَ برجاہ

بلوچستان ءَ برجاھیں ریاستی زوراکی ءِ ھلاپ ءَ انسانی ھکانی ھاتر ءَ توار چست کنوکیں گل بی وائی سی ءُ وائس فار بلوچ مسنگ پرسنز ءِ زھرشانی نندانک برجاہ ءَ اِنت-

اے گلاں ھر وھد ءَ ریاستی زوراکی ءُ زورانسری بیگواھی ءُ درکانودی کوش ءِ ھلاپ ءَ توار چست کنگ ءَ اَنت پہ بیگواھیں مردمانی کھولاں اے گل بلاھیں اُمیت اَنت-

شال ءَ بلوچستان ءَ زورانسری آوار جنیانی ھلاپ ءَ وائس فار بلوچ مسنگ پرسنز ءِ برجاہ زھرشانی بُنجل شال ءِ پریس کلب ءِ دیم ءَ برجاہ ءَ اِنت-

گل ءِ ایگزیکٹو کمیٹی ءِ باسک نیاز مھمد ءِ سروکی ءَ چہ شال پریس کلب ءِ دیم ءَ زھرشانی ءَ مروچی پنچ ھزار نُھ سد سی ءُ چار روچ سرجم بیتگ – اے درگت ءَ کھول ءُ دگراں زورانسری آوار جنی ءِ گر ءُ دار ءُ بیگواھیں مردمانی یل کنائینگ ءِ لوٹ کتگ-

زانگ بہ بیت اے بُنجل ماما کدیر بلوچ ءِ سروکی ءَ چہ برجاہ بیتگ بلے چیزے وھد اِنت کہ ماما کدیر نادُراہ ءَ اِنت پہ الاج ءِ ھاتر ءَ نادُراھجاہ ءَ اِنت-

دومی نیمگ ءَ کراچی پریس کلب ءِ ڈن زورانسری آوار جنی ءِ ھلاپ ءَ جنگ بیتگیں زھرشانی بُنجل یکشمبے ءِ روچ ءَ سی چارمی ءَ پُترتگ – بیگواھیں زاھد علی بلوچ ءِ پت عبدالحمید بلوچ ءَ رسانکدر ءَ چہ تران کنان ءَ گوشتگ کہ اے آئی ءِ ورنا ایں چُک ھپدہ جولائی دوھزار بیست پنچ ءِ بیگاہ ءَ چہ لیاری ءَ بیگواہ کنگ بیتگ- چمگّندانی رِد ءَ سادھیں پوشاکانی تہ ءِ کارندھاں زاھد ھما وھد ءَ زورانسری آوار جتگ ءُ گاڑی ءَ نندارینتگ وھدے آ رکشہ سر ءَ سواری ءِ ودار ءَ بیتگ- وئیل ءَ پد آئی ءِ ھچ وڑیں ھال نیست-

عبدالحمید بلوچ ءَ گوشتگ کہ زاھد دیر نہ اِنت کہ کراچی یونیورسٹی ءِ انٹرنیشنل ریلیشنز ءِ پڑ ءَ گریجویشن سرجم کتگ – بے روزگاری ءِ کمی سوب ءَ آ مھنت مزدوری کنان ءَ رکشہ چلائینتگ دانکہ لوگ ءِ ھرچ ءَ سرجم کُت بہ کن آں-

پت ءِ گوشگ اِنت کہ منی چُک یک مھنتی ورنایے، کہ وتی کھول ءِ کوپگ جوڑ بیتگ- بلے مروچی چہ آ مارا پُلّگ بیتگ- اگاں آئی ءِ سر ءَ چُشیں بھتامے ھست گُڑا آمیدگس ءَ۔پیش بہ کن اِت – کانود سبب ءَ درستانی واستا یک ھساب بہ بیت-

آئی ءَ گمیگیے ءَ گوشتگ کہ آ پیسر ءَ جگر ءِ نادُراھی ءِ آماچ بیتگ ءُ چُک ءِ زورانسری آوار جنی ءَ آئی ءِ نادُراھی گیش کتگ اَنت- زاھد ءِ مات ءَ ھمکروچ وتی چُک ءِ چیزاں گند اِیت ءُ دروازگ ءَ نگاہ داشتگ ءُ آئی ءِ واتری ءِ ودار ءَ اِنت-

انسانی ھکانی کارکنانی رِد ءَ، کراچی ءِ جتاجتائیں دمگاں چہ بازیں بلوچ ورنایے بیگواہ کتگ اَنت کہ آیانی تہ ءَ ماری پور ءُ لال بکھر ھاکس ءَ سیادی داروکیں شیراز بلوچ، سیلان بلوچ، سرفراز بلوچ، رمیز بلوچ ، رھیم بخش بلوچ ءُ رھمان بلوچ ھوار اَنت-

عبدالحمید بلوچ ءَ سول سوسائٹی، انسانی ھکانی گل ءُ رسانکدر ءَ چہ دزبندی کتگ کہ آئی ءِ چُک ءَ ھوار سرجمیں بیگواھیں مردمانی یل کنائینگ ھاتر ءَ توار چست بہ کن اَنت-

ھمے وڑ اسلام آباد ءَ چہ بلوچستان ءَ سیادی داروکیں بیگواھیں مردمانی کھول ءَ تھکاری وزیر طلال چوھدری ءِ انّگیں شنگ بیتگیں درشان گوں تُرندی ءَ رد کتگ چریشی ءَ آئی ءَ اسلام آباد پریس کلب ءِ ڈن ءَ برجاھیں نندانک سیاسی مول ءُ مراد گوشتگ-

اے گپ سر ءَ زھرشانی کنوکاں اے بھتام وتگڑ ءُ ریاست بلوچ راج ءِ ھلاپ ءَ جُھلیں کینگ ءِ درشان گوشتگ-

اسلام آباد ءَ زھرشانی نندانک ھند ءَ چہ پریس کانفرنس کنان ءَ کھول ءَ گوشتگ کہ آئی ءِ سنگت ریاست ءِ رویشگ یک واجھے ءِ ناپرمانیں ایردستے ءِ وڑ ءَ اِنت-

کھول ءَ گوشتگ کہ اگاں ملک ءِ آمیدگس آزات بہ بیتیناں گُڑا آ طلال چوھدری ءِ ھلاپ ءَ کانونی کاروائی کتگ اِت ئے ءُ آئی ءَ چہ منانک لوٹ اِتگ اِت کہ مئے پُشت ءَ کے اِنت ما کدی ءُ کجا کانود پروشتگ؟ آئی ءَ جُست چست کتگ کہ اگاں آیانی لوٹانی سرجم کنگ ءَ ھکومت ءِ دست ءَ نہ اِنت گُڑا آ مارا بگش اِیت ما کئی کر ءَ وتی لوٹاں پیش بہ کن ایں؟

آئی ءَ دیمتر ءَ گوشتگ کہ طلال چوھدری وت وتی ادارھانی دیم ءَ بے وس اِنت یا اے زوراک ءِ بھر اِنت آ گپ دیوان ءِ در ءَ بند کنت مئے سر ءَ دروگیں بھتام جنت-

بلوچ کھول ءَ تچک کتگ کہ آ گوستگیں پنجاہ چارمی روچ ءَ اسلام آباد ءَ پُرایمنیں زھرشانی ءَ نشتگ اَنت ءُ نو ریاستی بھتامانی نشانگ بیگ ءَ اَنت کہ وت ریاست ءُ آئی ءِ ادارھانی واستا یک شرمندگی یے-

آیاں جار جتگ کہ مئے پُرامنیں زھرشانی برجاہ بیت ما وتی زندمان، پجّار ءُ انساپ ءِ ھک ءِ ھاتر ءَ پُرایمنیں جُھد ءَ برجاہ دار ایں ءُ ھمینچو دراجتر اے زھرشانی بہ روت ھمینچو شرمندگی ریاستی ادارھانی بھر ءَ کئیت-