بلوچستان ءَ انٹرنیٹ ءِ بندش: سرکار زھرشانی ءُ راستیانی چیردیگ ءِ جھد ءَ انت- ایمنسٹی

ایمنسٹی انٹرنیشنل ءَ بلوچستان ءَ انٹرنیٹ ءِ بندش ءُ پابندی انسانی ھکانی سنگینین لگتمالی انت-

ایمنسٹی انٹرنیشنل ساؤتھ ایشیا ءَ 6 ستمبر ءَ بلوچستان ءَ موبائل انٹرنیٹ سروسز ءِ بند کنگ ءِ حکومت ءِ پیسلہ ءِ سر ءَ سکا پدردی درشان کتگ ءُ گْوشتگ کہ اے گامگیج نہ ایوک ءَ مردمانی ھک ءِ مالومداری ءُ لبز ءِ آجوئی ءِ سر ءَ اُرش اِنت بلکیں بلوچستان ءَ چہ دگنیا ءَ سندگ ءِ کوشستے۔

ایمنسٹی ءَ گشتگ کہ موبائل انٹرنیٹ بلوچستان ءِ مھلوک ءَ را رھوتی ءِ مستریں در انت ءُ ایشی ءَ یکشل ءَ بند کنگ بنکی ھکانی لگتمالی انت-

بیان ءِ تہ ءَ بلوچستان سرکار ءِ سر ءَ بھتام جنگ بوتگ کہ آ اے پندل ءَ پہ زھرشانی ءِ توار ءِ ایرموش کنگ ءُ راستیانی دیم ءَ چیر دیگ ءَ کارمرد کنگ ءَ اِنت ۔

ایمنسٹی ءَ لوٹ کرتگ کہ بلوچستان ءَ زوت انٹرنیٹ سروسز پچ کنگ بہ بیت ءُ شھریاں چہ آزادی ءِ لبز ءُ گشت ءُ آجوئی ءُ پرامنیں زھرشانی ءِ ھک ءَ چہ زبھر کنگ ءِ چکر ھلاس کنگ بہ بیت۔

زانگ بہ بیت گوستگیں ماہ ءِ اگست ءِ بندات ءَ چہ سرجمیں بلوچستان ءَ موبائل انٹرنیٹ سروس بند کنگ بوتگ انت وھدے کہ اے ماہ ءَ لھتے دمگانی تہ ءَ انٹرنیٹ ءِ پچ بوگ ءَ پد پد ءَ بند کنگ بوتگ۔

اُستانی سرکار ءَ بلوچستان ءَ انٹرنیٹ بند کنگ ءِ پرمان داتگ بلے بلوچستان ھائی کورٹ ءِ انٹرنیٹ ءِ پچکنگ ءِ پیسلہ ءَ ابید ھم استان ءِ گیشتریں دمگاں انگت ءَ انٹرنیٹ ءِ آسراتی ءَ چہ زبھر انت۔

دمگی مردماں شکایت کتگ کہ انٹرنیٹ بند بوھگ ءِ سبب ءَ نودربر سک باز وانگ ءُ زانگ ءِ جیڑھانی آماچ اَنت۔ آ نہ ایوک ءَ آن لائن کلاس، داخلہ فارم، اسکالرشپ ءِ درگواست ءُ وانگ ءُ زانگ ءِ ساماناں چہ زبھر انت بلکیں آ دگہ ھاسیں وانگ ءُ زانگ ءِ کارانی تہ ءَ ھم آڑانکانی آماچ انت۔

ھمے رنگ ءَ لس شھری آن لائن بینکنگ، روزگار ءِ درچ ، انفارمیشن درچ ءُ دگہ ھاسیں روچ ءِ کارانی پیلو کنگ ءَ ھم مشکلانی آماچ انت۔

سرکار ءَ انٹرنیٹ ءِ بند بوگ ءِ سوب بلوچستان ءِ ایمنی ءِ جاور لیک اِتگ، البت سیاسی، چاگردی ءُ انسانی ھکانی پڑاں چہ سرکار ءَ لوٹ کرتگ کہ انٹرنیٹ زوت پچ کنگ بہ کنت۔