بلوچستان ءَ پاکستانی لشکر ءِ سر ءَ اُرش ءُ واکداراں کارندھانی بیرانی ھال راست، بلوچ سلاہ بنداں اُرشانی زمہ واری من اتگ انت

بلوچستان ءِ جتاجتائیں دمگاں بلوچ آجوئی لوٹوکیں سلاہ بندیں گلانی نیمگ ءَ پاکستانی پوج ءُ آئی شر شریکدار ءُ چاروکی کیمرھانی سر ءَ اُرش یکشل ءَ برجاہ ءَ اَنت –

بلوچستان ءِ دمگ آواران ءِ ھند جھاؤ ءَ چہ آئی ای ڈی تراک ءَ پاکستانی پوج نشانگ کنگ بیتگ، چریشی ءَ بازیں کارندھے بیران ءُ ٹپی بیتگ اَنت-

پوج ءِ واکدار ءَ بمب اُرش ءِ ھال راست کتگ ءُ گوشتگ کہ ایف سی 109 ءِ وانگ ءِ کارندہ محمد زبیر ءُ رحمت اللہ بیران بیتگ اَنت-

بلے بیرانیانی کچ ایشاں چہ گیشتر بنت، تراک ءَ پد پوجی ایمبولینس ءِ سر ءَ بیران بیتگیں کارندہ ءُ ٹپی ئیں کارندہ نادُراھجاہ ءَ برگ بیتگ اَنت-

ویل ءَ پد پوج ءَ دمگ انگیر ءَ کتگ سرچ آپریشن بندات کتگ-

زانگ بہ بیت بلوچستان ءَ پوج ءِ سر ءَ بیست ءُ چار کلانی میان ءَ اے دومی مزنیں اُرش اِنت، اشی ءَ ساری کیچ ءِ دمگ زامران ءَ ھم پاکستانی پوج ءَ اُرش ءِ پدری کتگ اَنت کہ ھپت کارندہ بیران بیتگ اِت اَنت –

جھاؤ ءَ بیتگیں اُرش ءِ زمہ واری انگت ءَ ھچ گل ءَ نہ زرتگ بلے زامران ءَ بیتگیں اُرش ءِ زمہ واری بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں گوستگیں روچ ءَ کیچ ءِ ھند زامران ، نوانو ءَ پوج ءِ گاڑی یے ھما وھد ءَ ریموٹ کنٹرول آئی ای ڈی اُرش ءَ نشانگ کتگ وھدے زورگریں پوج پہ زوراکی ءَ ھمے دمگ ءَ لشکرکشی ءِ نیئت پیشکدمی جھد ءَ بیتگ۔

جارکش ءَ گوشتگ کہ تراک ءِ آسر ءَ پاکستانی پوج ءِ نائب صوبیدار فاروق، لانس نائک کریم داد ، انس نائک ھدایت ، سپاھی اویس ءُ سپاھی علی ءَ ھوار ھپت کارندہ جاھی مرتگ ءُ دگہ چار کارندہ سک ٹپی بیتگ ، ھمے دژمن ءِ گاڑی سرجم ءَ تباہ بیتگ۔

آئی ءَ گوشتگ کہ بی ایل اے ءِ سرمچاراں مرچی کولواہ ءِ ھند مادگ کلات ءَ زورگریں پاکستانی پوج ءِ چوکی ءِ سر ءَ اُرش کرتگ ، سرمچارں گوں راکٹ آدگہ ٹوھیں سلاھاں پوج ءِ سنگر نشانگ کرتگ اَنت ءُ جانی ءُ مالی تاون داتگ۔

جارکش ءَ گوشتگ کہ بی ایل اے ءِ سرمچاراں بولان ءِ ھند شورکنڈ ءَ پاکستانی پوج ءِ جتگیں چاریگی کیمرہ نشانگ کرتگ ءُ تباہ کرتگ اَنت۔

ھمے وڑ بلوچ آجوئی لوٹوکیں گل بلوچستان لبریشن فرنٹ ءَ وتی شنگ کتگیں درشان ءِ تہ ءَ گوشتگ کہ بنداتی اُرش ءَ جاھو ڈولیجی ءَ موسیٰ کمب ءَ زورگریں پوج ءِ چوکی چار ءِ نزیک ءَ گوں مزنیں سلاھاں نشانگ کرتگ، ھمے وھد ءَ سرمچاراں ڈولیجی ءَ دژمنیں پوج ءِ مزنیں بنجل ءِ سر ءَ چہ دو نیمگاں اُرش کرتگ ءُ اے کاروائی داں بیست دمان ءَ برجاہ بیتگ۔

جارکش ءَ گوشتگ چو مدامی وڑ ءَ دژمنیں پوج ءَ لس آبادی ءِ سر ءَ مارٹر ءُ آر پی جی ءِ باز گولا آس داتگ۔ پد ءَ ھم سرمچار کاروائی ءَ پد پہ سلامتی درکپتگ اَنت۔

جارکش ءَ گوشتگ کہ بیست یک اگست ءَ بی ایل ایف ءِ سرمچاراں سھب ءِ پنچ ءِ نزیک ءَ سوراب ءِ ھند نگاڑی ءَ شال کراچی شھدگ ءَ پاکستانی پوج ءِ کاروان ءَ ھواریں یک گاڑی یے گوں بمب ءَ نشانگ کرتگ۔ اُرش ءِ آسر ءَ گاڑی ءَ سواریں پنچ کارمند مرتگ اَنت ءُ سے ٹپی بیتگ اَنت ۔ گاڑی سرجم ءَ تباہ بیتگ۔

جارکش ءَ گوشتگ کہ بیست ءُ ھشت اگست ءِ شپ ءَ یازدہ ءِ نزیک ءَ بی ایل ایپ ءِ سرمچاراں تربت ءِ ھند شھرک ءَ نادراھجاہ ءِ سر ءَ جتگیں کیمرہ نشانگ کرتگ اَنت آ دژمنیں پوج ءِ نیمگ ءَ پہ مردمانی زندگی ءُ رازداری ءِ ھکانی لگتمال کنگ ءَ جنگ بیتگ اَنت۔

جارکش ءَ گوشتگ سرمچاراں اے کیمرہ ھمے بنیاد ءَ نشانگ کرتگ اَنت کہ کوہ ءُ کوچگی آھوکیں سادگیں بلوچانی شرپ ءِ بگیری مہ بیت۔ پہ اے وڑیں کار ءُ کارپدانی بگیری ءَ ترندیں کاروائی کن ایں۔

جارکش ءَ گوشتگ ما زورگریں ریاستی ادارھاں چہ رسانکدر ءَ کڈن کن ایں کہ مردمانی رازداری ءُ زاتی زندگی ءِ تر ءُ گرد ءِ ھکانی شرپ ءَ بہ کنت، اگاں نہ پہ اے وڑیں ناشریں کارپدانی آسر ءَ جاڑیگ بہ بیت۔

دوئیں گلاں گُڈی ءَ وتی درشانانی تہ ءَ اُرشانی زمہ واری منّ اِتگ اَنت-