بلوچستان : زورانسری آوار جنی ءُ سیاسی دزگیری، شال، کراچی ءُ اسلام آباد ءَ زھرشانی برجاہ

کھول ءُ گل ءِ نیمگ ءَ چہ جتاجتائیں شھراں زھرشانی نندانک مروچی ھم برجاہ-

گیشیں ھالانی رِد ءَ بلوچستان ءُ کراچی ءَ چہ زورانسری آوار جنی ءُ بلوچ یکجھتی کمیٹی ءِ دزگیریں سروکانی یل نہ کنگ ءِ ھلاپ ءَ شال، کراچی ءُ اسلام آباد ءَ زھرشانی ءُ نندکانی درچ برجاہ-

شال ءَ وائس فار بلوچ مسنگ پرسنز ءِ دراجکشیں زھرشانی ءَ مروچی 5923 روچ ءَ پُترتگ، شال پریس کلب ءِ دیم ءَ جتگیں اے زھرشانی بُنجل ءَ جتاجتائیں تک ءُ پھناتاں سیادی داروکیں مردماں بھر زرتگ ءُ ھمدردی درشان کتگ-

زھرشانی کنوکاں زورانسری آوار جنی ءُ بیگواھیں مردماں درکانودی کوش ءِ سر ءَ تُرس درشان کتگ ءُ بیگواھیں مردماں زوت یل کنائینگ ءِ لوٹ کتگ-

ھمے وڑ اسلام آباد ءَ بیگواھیں مردمانی یل کنائینگ ءُ بی وائی سی ءِ سروکانی یل کنائینگ ءِ ھاتر ءَ نندانک ءَ چل سے روچ سرجم بوتگ، زھرشانی کنوکانی گوشگ اِنت کہ اے زھرشانی تھنا بیگواھیں رھشون ءُ کارکنانی یل کنائینگ ءِ لوٹ اناں بلکیں زُلم ءُ زوراکی ءِ سرجمیں نزام ءِ ھلاپ ءَ یک پُرایمنیں گھگیری-

آیاں دیمتر ءَ گوشتگ کہ زالبول، چُک ءُ کماش تُرندیں سارتی، شُد ءُ دمبرگ ءَ اَبید نندانک ءِ ھند سر ءَ ساڑی اَنت مارا باور اِنت کہ راستی ءِ تاکت ھرچ تُپنگ ءُ ھرچ وڑیں زوراکی ءَ چہ مستر اِنت ءُ آئی ءَ ستک ءِ گوم ءَ ما وتی جُھد برجاہ داشتگ-

دیمتر ءَ گوشتگ کہ کراچی ءَ چہ سیادی داروکیں بلوچ نودربر زاھد علی ءِ زورانسری آوار جنی ءِ ھلاپ ءَ آئی ءِ کھول زھرشانی بُنجل ھم کراچی پریس کلب ءِ دیم ءَ مروچی یکشل ءَ بیست دومی روچ ءَ برجاہ ءَ اِنت-

کراچی ءَ زاھد علی ءِ کھول ءِ گوشگ اِنت کہ زاھد علی کہ شھدربرجاہ کراچی ءَ میانی استمانی سیادی ءِ بیست پنچ سالی ئیں بلوچ نودربر ھپدہ جولائی 2025 ءَ پاکستانی پوج ءِ دست ءَ زورانسری بیگواہ کنگ بیتگ آئی ءِ ھمراھی ءَ رکشہ ھم برتگ گوں کہ نیم وھد ءِ بھر ءَ وتی لوگ ءِ ھرچ ءُ درچ ءِ سرجم کنگ ءِ ھاتر ءَ چلائینتگ-

کھول ءِ گوشگ اِنت کہ یکشل ءَ زھرشانی ءُ نندانک ءَ اَبید واکدار ءِ نیمگ ءَ چہ ھچ وڑیں منانک دیگ بیتگ نانکہ کانودی کاروائی کنگ بیتگ ءُ نانکہ انساپ دیگ بیتگ-

آیانی رِد ءَ زاھد ءِ جیڑہ ھما ھزرانی بیگواھیں مردماں چہ یکے آیاں بلوچ کھول تباہ کتگ اَنت، کھول ءَ سیاسی ءُ انسانی ھکانی گلاں چہ دزبندی کتگ کہ آ زاھد علی ءِ یل کنائینگ ءَ کرد پیلو بہ کن اَنت-