زالبول چہ بدکاری ءِ وئیل، ڈیتھ اسکواڈ بلوچ ءِ چاگرد ءَ سگگ نہ بیت- ڈاکٹر صبیحہ بلوچ

ھُزدار ءَ دمگی زالبول ءِ گوم ءَ سرکاری پلامرزی ٹولی ءِ باسک نیمگ ءَ چہ بدکاری ءِ وئیل ءَ بلوچ سیاسی ءُ چاگردی مردماں تُرندیں زھر ءِ درشان ودی بیتگ-

سیاسی ءُ انسانی ھکانی باسکاں وئیل ءِ ایر جنان ءَ سانمندیں زالبول ءِ واستا انساپ ءِ لوٹ کتگ-

بلوچ یکجھتی کمیٹی ءِ رھشون ڈاکٹر صبیحہ بلوچ ءَ اے درگت ءَ چہ سوشل میڈیا ءَ درشان شنگ کنان ءَ گوشتگ کہ ڈیتھ اسکواڈ جرمکاریں ٹولی یے نہ اِنت بلکیں رستر اَنت ءُ اے رسترانی لگام آیانی چہ ھم مستریں رسترانی دست ءَ اَنت-

آیانی رِد ءَ اے مردم تھنا آوار جنگ زورانسری آوار جنی، لَٹ ءُ کُٹ، زمینانی سر ءَ دستیگ کنگ، منشیات فروشی دُزی وڑیں جرمکاری ءَ مھدود نہ اَنت بلکیں زالبول ءُ چُکاں ھم بدکاری ءِ نشانگ کنگ ءَ اِنت-

ڈاکٹر صبیحہ بلوچ ءَن لوٹ کتگ کہ اے ٹولی ءِ واستا تُرند ءَ چہ تُرندیں سزا دیگ بہ بنت-

آئی ءَ دزبندی کتگ کہ آ ھرچ پرد کہ آیاں توار ءَ اش کن اَنت آیانی سر ءَ پرز اِنت کہ آ اے زوراکی ءِ ھلاپ ءَ توار چست بہ کن اَنت ءُ چاگرد ءَ تلان بہ کن اَنت-

وتی درشان ءِ گُڈی ءَ صبیحہ بلوچ ءَ گوشتگ کہ ھدا ءَ بچار اِت وتی چُکاں شریں ھلکاری بدے اِت ھدا ءَ انسان جوڑ کتگ ءُ اے جھان ءَ راہ داتگ اَنت آیاں رستر بیگ ءَ میل اِت-

زانگ بہ بیت کہ گوستگیں روچ ءَ ھُزدار ءُ پریس کانفرنس کنان ءَ ھُزدار ءِ دمگ چہ کوشک ءَ سیادی داروکیں زالبول صغریٰ بی بی ءَ بھتام جتگ کہ آ ھُزدار ءَ ڈیتھ اسکواڈ ءِ باسکے ءَ آوار جنگ ءَ پد شش کلاکاں تاں بدکاری ءُ لَٹ ءُ کُٹانی نشانگ کتگ-

وئیل ءِ درگت ءَ چہ دمگی پولیس واکدار ءَ چہ ھال کنگ ءَ واکدار ءَ گوشتگ وئیل ءِ شکایت نکش کتگ، بلے تنی وھدے میارباری دزگیر کنگ نہ بیتگ اَنت-