ھزدار ءِ نندوکیں سُگرا بی بی ءَ وتی پریات زرتگ ءُ ھزدار پریس کلب ءَ سر بوتگ ءُ اھوالکاراں گوں تران کنان ءَ گشتگے کہ من آوار جنگ بوتگ آں، ٹارچر کنگ بوتگ ءُ زیادتی کنگ بوتگ ءُ من ءَ انساپ دیگ بہ بیت اگاں نہ من مرگ ءَ پہ وت گچین کن آں۔
اے درچ ءَ زالبول ءِ مات ءَ قرآن مجید چِست کتگ ءُ پریس کانفرنس ءَ بھر زرتگ۔
ھزدار ءِ کوشک ءِ دمگ ءَ گوں سیادی داروکیں سُگرا بی بی نامیں جنینے گوستگیں روچ ءَ بوتگیں وئیل ءَ پد گوں پریاتے زرتگ ءُ ھزدار پریس کلب ءَ سر بوتگ۔ آئی ءِ مات وتی دست ءَ قرآن مجید ءَ گوں پریس کلب ءَ اتکگ بیتگ۔ آئی ءِ برات ءُ گوھار، ناکوزتک ءُ سیاد ءُ وارساں ھم پریس کانفرنس ءَ بھر زرتگ۔
سانمندیں جنک بی بی سُگرا ءَ گْوشتگ کہ آئی ءِ اسامہ خدرانی ء حاجی عمر کہ یک تاکت وریں مردمے آئی ءَ سھب ءَ چہ لوگ ءِ نزیک ءَ آوار جتگ۔ سگرا بی بی ءِ گشگ اِنت کہ اے وئیل ھما وھد ءَ بوتگ کہ آ چہ وتی لوگ ءَ وتی کسانیں گوھار ھمراھی ءَ درزی ءِ دکان ءَ روگ ءَ بوتگ کہ اود ءَ جرمکار ءَ آئی ءَ را فارچونر گاڑی ءَ زورانسری سوار کتگ-
سگرا بی بی ءَ رسانکدر ءِ نمائندگاں گوں تران کنان ءَ گْوشتگ کہ آوار جنگ ءَ پد ملزم اسامہ ءَ آئی ءَ را سکیں ٹارچر کتگ ءُ مبینہ نشہ ءِ منشیات یا چیزانی کارمرد کنگ ءَ آئی ءِ سر ءَ سلکاری کتگ۔
آئی ءَ گوشتگ کہ من یک یتیمیں جنکے آں ءُ ھما رنج ءُ گماں کہ من ءَ مرچی گوزگی انت اے بلوچ راج ءِ گیرت ءِ گپ انت۔ اگاں من ءَ انساپ نہ رس ات گڑا من مرگ ءَ پہ وت گچین کن آں۔ من زندگ بوھگ ءَ چہ مرگ ءَ وشتر زاناں بلے اے زلم ءُ زوراکی ءَ برداشت نہ کناں۔
پریس کانفرنسے ءَ گوں تران کنان ءَ سگرہ بی بی ءِ مات ءَ گشتگ کہ ما گریبیں مردم ایں مئے ھچ وڑیں ھمایتکار نیست ۔ من وتی گریوگ ءَ اللہ تعالیٰ ءِ دیم ءَ پیش کناں ۔ اللہ تعالیٰ ہما زالمانی سر ءَ ہمے بہ کنت کہ منی گوں بوتگ۔
دگہ لوگ ءِ مردماں ھم اے وئیل ءِ ھال درشان کتگ ءُ گْوشتگ کہ سگرا بی بی آوار جنگ ءَ چہ لھتیں کلاک ءَ پد یلہ کنگ بوتگ بلے آ وھد ءَ آئی ءِ جاور ھال ھراب بوتگ اَنت۔
آھاں بھتام جتگ کہ جرمکار اسامہ یک تاکتوریں مردمے ءُ بوت کنت کہ آ کانون ءَ چہ رکگ ءِ جھد ءَ بہ کنت۔
پریس کانفرنس ءَ ھواریں سیاد ءُ وارساں رسانکدر ءَ چہ دزبنددی کتگ کہ اے جیڑہ ءَ را پدر بہ کن انت دانکہ زالبولانی ھک ءِ رکھینگ بہ بیت۔ پریس کانفرنس ءِ گڈسرا سُگرہ بی بی ءَ یکرندے پد ءَ پریات کت کہ من ءَ انساپ لوٹ ایت اگاں کانون منی رکھینگ ءَ مہ کنت من وتی زندمان ءَ ھلاس کن آں۔
پولیس ءِ دمگی کارندھاں گوں رھوت کنگ ءَ گشتگ کہ ارزی درج کنگ بوتگ ءُ پٹ ءُ پول بندات کنگ بوتگ بلے انگت ءَ جرمکار دزگیر نہ بوتگ۔
اے ویل ھزدار ءِ وڑیں دمگ ءَ گیش بوھوکیں ویلاں زالبولانی سر ءَ جرم گیش بوھگ ءِ دگہ یک درورے ۔
ایشی ءَ چہ پیسر دگہ یک وئیلے ءَ پیسریگیں سر وزیر ثنا اللہ زھری ءِ نائب ءِ برات ءُ دمگی ڈیتھ اسکواڈ ءِ باسکاں یک جنینے آوار جنگ ءُ آئی ءَ را زبردستی آروس کنگ ءِ کوشست کتگ کہ ایشی ءِ سبب ءَ سرجمیں بلوچستان ءَ مزنیں زھرشانی یے بوتگ۔
چہ ھزدار ءَ آوار جنگ بوتگیں جنین رند ءَ یل کنگ بوتگ بلے آوار جنوکانی ھلاپ ءَ انگت ءَ ھچ وڑیں کارروائی کنگ نہ بوتگ۔ دمگی مردمانی رد ءَ حاجی عمر ءِ زھگ اسامہ ءَ کہ آئی ءَ سگرا بی بی ءِ سر ءَ زوراکی کتگ ، آ ھم ھمے وڑیں سرکار ءِ کمک ءَ ڈیتھ اسکواڈ ءِ باسک اِنت ۔
زانگ بہ بیت کہ بلوچستان ءَ سرکاری کمکی گل کہ دمگی دروشم ءَ ڈیتھ اسکواڈ ءِ نام ءَ زانگ بنت، بازیں چاگردی بدکاری، تاوان ءِ ھاتر ءَ آوار جنگ ءُ بلوچ سیاسی جھدکارانی پہ زور بیگواہ کنگ ءَ ھوار اَنت۔
بلوچستان ءِ دمگی سیاسی گلاں باز رند ءَ چہ سرکار ءَ لوٹ کتگ کہ اے گلانی ھلاپ ءَ کارروائی بہ کنت ءُ آیانی کمک ءَ یلہ بہ دنت، بلے انگت ءَ اے درگت ءَ ھچ وڑیں دیمروئی نہ بوتگ۔