پنجگور : دو براتاں ھوار چار مردم پاکستانی پوج ءِ دست ءَ چہ بیگواہ

بلوچستان ءِ دمگ چہ پنجگور ءَ پاکستانی پوج ءَ دو براتاں ھوار چار مردم آوار جنگ ءَ پد ناشناسیں ھندے ءَ برتگ اَنت-

زورانسری آوار جنی ءِ نشانگ بیتگیں دو برات انیس ءُ چنگیز ء ملک ابرار، بالاچ بلوچ ءُ فراز بلوچ ھوار اَنت-

اِھوالکار رِد ءَ اے مردم پنجگور ءِ دمگ چہ گرمکان ءَ پوج ءَ آوار جتگ چریشی ءَ پد آئی ءِ ھچ وڑیں ھال نیست-

زانگ بہ بیت کہ بلوچستان ءَ زورانسری آوار جنی ءِ سنگین ءُ دیرگیں جیڑھے انسانی ھکانی ادارھانی رِد ءَ زورانسری آوار جنی ءِ نشانگ بیتگیں مردمانی کچ ھزرانی بنت-

انسانی ھکانی گل ءُ بیگواھیں مردمانی کھول گوستگیں بازیں سالاں چہ شال ءَ ھوار جتاجتائیں شھراں زھرشانی کنگ ءَ اَنت-

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، دی بلوچستان پوسٹ ءَ دزکپتگیں رپورٹس ءِ رِد ءَ ھمے ماہ اگست ءَ پاکستانی پوج ءَ بلوچستان ءِ جتاجتائیں دمگاں چہ کم چہ کم پنجاہ دو مردم آوار جتگ ءُ بیگواہ کتگ اَنت-

اے ماہ ءَ دوازدہ بیگواھیں مردم آجو بیتگ اَنت، وھدے کہ پنچ بیگواھیں مردمانی لاش دزکپتگ اَنت-