ناصر آباد، بسیمہ ءَ پد زیارت ءَ ھم کرپیو جنگ بیتگ، شھری سک دلسیاہ اَنت

بلوچستان ءِ دمگ زیارت ءَ گوستگیں یک ھپتگے ءَ چہ کرپیو دروشمیں جاور جنگ بیتگ چریشی ءِ سبب ءَ ھمکروچی زند جنجالانی دیمپان اِنت، ورگی توژگ ءِ نہ بیگ ءُ زانشتی ادارھانی بندگ بیگ ءِ سبب ءَ شھری سک دلسیاھی ءِ دیمپان اَنت-

شھریانی گوشگ اِنت کہ کرپیو ءِ سبب ءَ چہ ھمکروچی ھژدری توژگ ءِ دزکپگ ءَ نہ اِنت، وھدے کہ اسکول ءُ کالجز ءِ بند بیگ ءَ چہ نودربرانی زانشتی ءِ سال ءِ زوال بیگ تُرس ودی بیتگ-

دمگی مردماں ھکومت ءَ چہ لوٹ کتگ کہ زوت جاوراں شر بکنت ءُ شھریاں دیمپان دلسیاھیاں شر بہ کن اَنت-

زانگ بہ بیت کہ دہ اگست ءَ زیارت ءَ چہ سیادی داروکیں اسسٹنٹ کمشنر ( اے سی) افضل باقی ءُ آئی ءِ چُک ءَ ھوار ناشناسیں سلاہ بندیں مردماں آوار جتگ، تنی وھدے یل کنگ نہ بوتگ-

وئیل ءَ پد سیکیورٹی فورسز ءَ شھر ءَ تُرندیں گامگیج زیرگ بیتگ، شھریاں بازار ءُ دگہ راجی ھندانی سر ءَ روگ ءَ چہ دارگ بیتگ اَنت وھدے کہ دکان ءُ کارباری بُنجاہ ھم گوستگیں یک ھپتگے ءَ چہ بند اَنت-

اشی ءَ ساری بلوچستان ءِ دمگ کیچ ءِ ھند ناسر آباد ءَ ھم پوج ءِ سر ءَ اُرشاں پد شھریاں لوگاں نندگ ءِ کڈن کنگ بیتگ، ھمے وڑ واشک ءِ دمگ بسیمہ ءَ ھم بازار ءُ کارباری بُنجاہ بند کنگ ءِ جار شنگ کنگ بیتگ اَنت-

زانگ بہ بیت کہ ھمے ماہ ءَ سیکیورٹی تُرس ءَ چہ بلوچستان ءِ بازیں دمگاں انٹرنیٹ، موباھل ءُ بینک ءِ سروسز ھم بند کنگ بیتگ اَنت کہ ھکومت سیکورٹی تُرس ءَ چہ ھم بند کنگ ءِ جار جتگ-

بلے چاردہ اگست ءَ پد جتاجتائیں شھراں انٹرنیٹ سروس ءِ پچ بیگ ءِ درچ بندات بیتگ-

ھکومت یا ھمگرنچیں واکدار نیمگ ءَ چہ زیارت ءَ ھوار دگہ دمگاں کار ءُ باری ءِ بند یا کرپیو درگت ءَ ھچ وڑیں درشان دیم ءَ نیتکگ-