بلوچستان ءِ تیابدپی شھر گوادر ءَ زورانسری بیگواھیں مردمانی پچ گرگ ءِ ھاتر ءَ گوادر ءَ ڈپٹی کمشنر ءِ کارگس ءِ دیم ءَ کھول ءُ حق دو تحریک ءِ نیمگ ءَ زھرشانی ءِ نندانک برجاہ اِنت۔
گیشیں ھالانی رد ءَ اے وھد ءَ گوادر ءَ ڈپٹی کمشنر ءِ کارگس ءِ دیم ءَ چہ گوادر ءَ پاکستانی لشکر ءِ دست ءَ زورانسری بیگواہ کتگیں مردمانی یل کنگ ءِ ھاتر ءَ کھول ءُ حق تحریک ءِ نیمگ ءَ زھرشانی نندانکے برجاہ کنگ بیتگ-
زھرشانی نندانک ءَ بیگواھیں مردمانی کھول ءُ حق دو تحریک ءِ چیئرمین حسین واڈیلہ ءُ باسک ھم ساڑی اَنت۔
زھرشانی ءِ نندانک ءَ بیگواھیں مردمانی زوت یل کنگ ءُ آیانی کھول ءَ انساپ دیگ ءِ لوٹ کنگ بوگ ءَ انت۔
حق دو تحریک ءَ گشتگ کہ اے زھرشانی داں ھما وھد ءَ برجاہ مانیت داں آھانی لوٹ منگ نہ بنت۔
زانگ بہ بیت گوستگیں روچ ءَ پاکستانی لشکر ءَ گوادر ءِ دمگ کلدان ءَ بیڑ برتگ ءُ سئے ورنا وسیم بلوچ ء لال جان ، وحید ء مراد ءُ دگہ یک مردمے دزگیر کتگ ءُ ناشناسیں جاھے ءَ برتگ انت۔
دومی نیمگ ءَ عثمان مقبول 24اگست ءَ چہ تربت ءَ پاکستانی لشکر ءَ زورانسری آوار جتگ ءُ بیگواہ کتگ۔
زانگ بہ بیت کہ عثمان مقبول پیسر ءَ 2019 ءَ زورانسری بیگواہ کنگ ءِ آماچ بوتگ ءُ 2021 ءَ یل کنگ بیتگ ءُ لوگ ءِ مردماں یک رندے پد ءَ عثمان مقبول ءِ یل دیگ ءِ ھاترا مزنیں واکداراں دزبندی کتگ۔