صادق مراد لوگ ءِ یکیں لاپ دیوک اِنت، ریاستی ادارہ زوت یل بہ کن انت ئِے – کھول

کراچی ءِ دمگ ملیر کلا بورڈ صدیق میتگ ءِ جھمنندیں بیست ءُ شش سالی ئیں ورنا صادق مراد ءِ زورانسری آوار جنی ءِ ھلاپ ءَ کھول ءَ کراچی پریس کانفرنس کنان ءَ ھکومتی ادارھاں چہ زوت یل کنگ ءِ لوٹ کتگ-

پریس کلب ءَ اِھوالکاراں گوں تران کنان ءَ کھول ءَ گوشتگ کہ بیست سے اگست 2025 ءِ سُھب ءِ کساس پنچ نیم ءَ سی ٹی ڈی، پولیس ءُ سادھیں پوشاکانی تہ ءِ کارندھاں کراچی ملیر ءَ آئی ءِ لوگ ءِ سر ءَ بیڑبرگ دروازگ پروشگ ءُ تہ ءَ پُترتگ اَنت-

کھول ءِ رِد ءَ اے میان ءَ سیکورٹی پورسز ءِ لوگ ءَ ساڑی ئیں کماش ءُ چُکانی سر ءَ زوراکی کتگ ءُ صادق مراد زورانسری وتی ھمراھی ءَ برتگ کھول ءِ رِد ءَ اے میان ءَ ناں چُشیں وارنٹے پیش داشتگ نانکہ کانودی کار سرجم کتگ اَنت-

کھول ءِ گوشگ اِنت کہ صادق مراد یک وانندھیں ورنایے ءُ لوگ ءِ لاپ دیوک اِنت آئی ءَ ھچ وڑیں درکانودی پُرکاریاں چہ سیادی نیست مئے چُک بے گناھے ما انساپ ءِ ھاتر ءَ کجا بہ رو ایں؟ آمیدگس ءُ ادارہ بے توار اَنت مارا ھرچ نیمگ ءَ چہ نا اُمیتی دیمپانی اِنت-

آیاں گوشتگ کہ وھدے ادارہ انساپ دیگ ءَ بے سوب بہ بنت گُڑا راج ءِ توار گُڈی آسر جوڑ بیت ھمے ھاتر ءَ ما رسانکدر ءَ چہ وتی پریات ءَ راج ءِ دیم ءَ ایر کتگ-

پریس کانفرنس ءَ ھوار دگہ سیاد ءُ نزیکیں مردماں زورانسری آوار جنی انسانی ھکانی سنگین ءِ ھلاپ ورزی گوشتگ کہ بے تواری زوراک ءَ گیش توانمند جوڑ کنت یکجاہ بہ بہ اِت ایردستانی پلامرزی کنگی اِنت-

کھول ءَ شھریاں، انسانی ھکانی گل ءُ سول سوسائٹی ءَ چہ دزبندی کتگ کہ آ اے وئیل ءِ ھلاپ ءَ توار چست بہ کن اَنت ءُ زورانسری آوار جنی وڑیں درکانودی گامگیج ءِ ھلاسی ءِ ھاتر ءَ زھرشانی ءُ گھگیری ءَ ھمگرنچ بہ بنت-