بلوچستان ءَ زورانسری آوار جنی ءِ دْرچ یکشل ءَ برجاہ، گوادر ءَ دگہ پنچ مردم بیگواہ

پاکستانی پوج ءَ چہ گوادر ءَ پنچ مردم آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ بلوچستان ءِ تیاب دپی شھر گوادر ءَ یکشمبے ءِ بیگاہ ءَ کُلدان ءُ گبد ءِ دمگاں کاروائی کنان ءَ پاکستانی پوج ءَ پنچ مردم آوار جتگ ءُ ناشناسیں جاھے ءَ برتگ اَنت-

دمگی اِھوالکار ءِ رِد ءَ ایف سی ءِ سے گاڑی ءُ دو پرپٹاں ھمگرنچیں کارندھاں اے دمگ ءَ مردم لَٹ ءُ کُٹانی نشانگ کتگ اَنت ءُ زورانسری وتی ھمراھی ءَ برتگ اَنت گوں-

وئیل ءَ پد پنچیں ورنا بیگواہ اَنت-

زورانسری بیگواہ کنگ بیتگینانی تہ ءَ سے ءِ پجّار سراج ء پیر محمد، وسیم ء لعل محمد ءُ وحید ء مراد نام ءَ چہ بیتگ اَنت وھدے کہ آ دگہ دوئیں مردمانی پجّار انگت نہ بیتگ اَنت-

زانگ بہ بیت کہ بلوچستان ءَ زورانسری آوار جنی ءِ دْرچ یک دراجیں مدتے ءَ چہ برجاہ ءَ اِنت ءُ ھمکروچ بلوچستان ءَ ھوار کراچی ءُ پاکستان ءِ آ دگہ شھراں ھم بلوچ شھریاں زورانسری بیگواھی ءِ ھال سر بیگ ءَ اِنت-

زورانسری آوار جنی ءِ ھلاپ ءَ اے وھد ءَ بلوچستان ءِ بُنجاھی شھر شال ءَ دراجیں شُدکُشیں ھڑتالی بُنجل برجاہ ءَ اِنت، وھدے کہ بیگواھیں مردمانی یل کنائینگ ھاتر ءَ اسلام آباد ءُ کراچی پریس کلبانی دیم ءَ ھم نندانک برجاہ ءَ اِنت-