ھُزدار : ریاستی پلامرزی سلاہ بندیں ٹولی ءِ دست ءَ دو ورنا بیران

بلوچستان ءِ دمگ ھُزدار ءِ ھند گریشہ ندگی ءَ ریاستی پلامرزی ٹولی ڈیتھ اسکواڈ ءِ کارندھانی تیرگواری ءَ چہ دو ورنا بیران بیتگ اَنت-

بیران بیتگیں مردمانی پجّار اقبال ء حکیم بلوچ ءُ نعیم ء شئے محمد ناماں چہ بیتگ اَنت- اقبال کراچی یونیورسٹی ءَ بی ایس ءِ نودربرے-

چمّگدنی گوشگ اِنت کہ سلاہ بندیں مردماں لس آبادی ” ڈیتھ اسکواڈ ” نام ءَ چہ زانگ بنت، ورنایانی سر ءَ تیرگواری ءِ کتگ ءُ چریشی ءِ آسر ءَ دوئیں ورنایاں جاہ پہ جاھے ساہ داتگ-

زانگ بہ بیت کہ بلوچستان ءَ ڈیتھ اسکواڈ ءِ دست ءَ ٹارگٹ کلنک ءُ بیگواہ ورنایانی نشانگ کنگ ءِ وئیل یکشل ءَ گیشی گندگ آیگ ءَ اِنت- دمگی گل ءُ انسانی ھکانی کارکنان باز رند ءَ ڈیتھ اسکواڈ ءِ پُرکاریانی سر ءَ تُرس ءِ درشان کن اَنت-

گوستگیں روچ ءَ ھم کیچ ءِ دمگ تمپ کونشقلات ءَ یک ورنایے ، اکمل بلوچ، تیرگواری کتگ ءُ کُشتگ-