بندیگجاہ ءَ بند کنگ ءَ زرمبشت نہ اوشت اِیت- ڈاکٹر ماہ رنگ بلوچ

بلوچ یکجھتی کمیٹی ءِ دزگیریں رھشون آمیدگس ءَ یکرندے پد ءَ پانزدہ روچ ءِ واستا ریمانڈ ءَ پولیس ءِ دست ءَ داتگ اَنت-

آمیدگس ءِ ڈن ءَ چہ تران کنان ءَ ماہ رنگ بلوچ ءَ گوشتگ کہ ریاست ءَ بی وائی سی رھشون ھمے ھاتر ءَ بندیگ کتگ اَنت دانکہ لَس راج ءَ بہ تُرسین آں – بلے آیاں تچک کتگ کہ ھچ ھما زرمبشت بندیگجاہ ءَ بند کنگ ءَ چہ پُشت ءَ نہ کنز اِیت-

آئی ءَ گوشتگ کہ بندیگجاہ ءِ دیوال ھمینچو مزبوت بہ بنت، یک ماتے ءِ ھوسلہ ءِ دیم ءَ ھلاس بیت- ما ھر وھد ءَ اد ءَ کا ایں، ءُ سرکاری وکیل ءَ ھرچ رند ءَ ارزبندی دے ایں-ھمے اے آمیدگس ءِ نزام ءِ راستی اِنت- مروچی ھما کانود سلاہ جوڑ کتگ نود روچاں تاں مردماں سی ٹی ڈی ءِ بندیگجاہ ءَ بند کنگ ءَ اَنت-

ماہ رنگ بلوچ ءَ دیمتر ءَ گوشتگ کہ اے زرمشبت ءِ راستیں تاکت لَس راج اِنت-” ما اے زرمشبت دگانی سر ءَ بندات کتگ ءُ مروچی آمیدگس تاں سر کتگ- ما اے تچک کنگ لوٹ ایں کہ ھمے آمیدگس، ھزرانی پشتون، سندھی ءُ بلوچ بیگواھیں مردمانی کیس چلگ ءَ اَنت ، آیانی پروٹیکشن آرڈرز ءَ اَبید آ یل کنگ نہ بیتگ اَنت، مروچی ھمے آمیدگس بی وائی سی ءِ ھلاپ ءَ دگ بندگ ءَ ناشرکاری ءِ ایف آئی آر ءَ چلائینگ ءَ اَنت-

آئی ءَ کڈن کتگ کہ ھچ ریاست راج ءَ اَبید برجاہ بیت نہ کنت – اے یک ناکامیں ریاستے، ءُ دیمتر ءَ روت آ زانت کہ ھمینچو زوراکی ءِ راج ءِ ھلاپ ءَ کارمرز کنگ بیت راج ھمینچو آئی ءِ ھلاپ بیت-

ماہ رنگ بلوچ ءَ وتی کلوہ ءَ گوشتگ کہ اسلام آباد ءَ گرم ءُ ھور ءَ اَبید سی روچ ءَ چہ زھرشانی کنوکیں ماتاں کلوہ دیگ لوٹ آں- مئے اے زرمبشت آؤکیں پدریچ ءِ واستا یک کلوھے زرتگ ءُ اَتکگ اَنت لس راج وتی ھکانی ھاتر ءَ دگانی سر ءَ در بیا اَنت-

آئی ءَ گوشتگ کہ ھما مردم مارا ایرموش یا نزور کنگ لوٹ آں آ وت نزور اَنت-

ماہ رنگ بلوچ ءَ یک جُستے ءِ پسّہ ءَ گوشتگ کہ سرفراز بگٹی سر وزیر بیگ ءَ زمہ واریں درشانانی دیگ جاہ ءَ بھتام جنگ ءَ اِنت – آ تھنا ریاستی پروپیگنڈ ءَ دیم ءَ برگ ءَ اِنت، بلے ایردستیں زرمبشت پروپیگنڈہ ءَ چہ سک باز دیم ءَ اَنت- تو ھچبر یک درشانے جوڑ کُت نہ کن ئے، پرچاکہ ما انساپ ءِ ھاتر ءَ درتکگ ایں – مئے زرمبشت راستی ءِ سر ءَ اِنت- تو ھمینچو دروگ بہ بند ءُ ھمینچو زر ھرچ بہ کن، مارا داشت نہ کن ئے، پرچاکہ ما راستی ءِ گوم ءَ ایں-