بسیمہ : چار ورنا پوج ءِ دست ءَ بیگواہ، چہ کیچ ءَ دو مردم یل کنگ بیتگ اَنت

چہ بلوچستان ءَ زورانسری آوار جنگ بیتگیں دو مردم یل کنگ بیتگ اَنت، دگہ چار مردم زورانسری بیگواہ کنگ بیتگ اَنت-

گیشیں ھالانی رِد ءَ پاکستانی لشکر ءَ بلوچستان ءِ دمگ واشک ءِ تھسیل بسیمہ ءَ کاروائی کنان ءَ چار ورنا آوار جتگ ءُ وتی ھمراھی ءَ برتگ اَنت-

ھالانی رِد ءَ پاکستانی لشکر ءَ صادق، فرید، عامر ءَ ھوار دگہ یک مردمے آوار جتگ ءُ بیگواہ کتگ چریشی ءَ پد چاریں مردم دیم ءَ آرگ نہ بیتگ اَنت-

زانگ بہ بیت کہ گوستگیں دو روچ ءَ چہ بسیمہ ءَ کرفیو جنگ بیتگ وھدے کہ دمگ ءَ پوج ءِ مزنیں کچے ءَ ساڑی اِنت-

پاکستانی پوج ءُ دمگی واکدار ءَ گوستگیں روچ ءَ دمگی آبادی لوگانی نندگ ءَ گوشتگ اَنت، دکانانی بند کنگ ءُ سپر ءِ وھد ءَ دمگی انتزامیہ ءَ موکل نامو زیرگ پرمان شنگ کتگ وھدے کہ ھلاپ ورزی کنوکاں دزگیر ءُ بیھا دیگ بیتگ اَنت-

دمگی اِھوالکار ءِ رِد ءَ انّیگاں بلوچ آجوئی ھم سنتیں گل براس ءِ نیمگ ءَ چہ پوج ءِ ھیڈکوارٹر سر ءَ اُرش ءَ پد دمگ ءَ کرفیو جنگ بیتگ، شھر ءَ جاگہ جاگہ پوج ءِ کارندہ اوشتاتگ اَنت ءُ بیگاہ پنچ ءَ پد شھریاں لوگانی دراھگ سر ءَ پابندی جنگ بیتگ-

زانگ بہ بیت کہ گوستگیں روچ ءَ براس ءِ اُرش ءَ پاکستانی پوج ءِ یک کیپٹنے ءَ ھوار سیزدہ کارندہ کشتگ اَنت وھدے کہ سرمچاراں پوج ءِ سلاہ ءُ دگہ سامان وتی دستیگ کتگ اَنت-

ھمے وڑ بلوچستان ءِ دمگ چہ کیچ ءَ سی یک جولائی 2024 ءَ زورانسری آوار جنگ بیتگیں میناز بلیدہ ءِ جھمنند جاوید علی ء علی ءُ چار اگست 2025 ءَ زورانسری آوار جنی ءِ نشانگ کنگ بیتگیں تجابان سنگ آباد ءِ جھمنند ڈاکٹر داد شاہ گوستگیں روچ ءَ آجو بیتگ اَنت-