مستونگ : پاکستانی پوج ءِ دست ءَ بیران بیتگیں ورنا ءِ کھول ءِ دزبندی سر ءَ ھڑتال

مستونگ ءَ پاکستانی پوج ءِ دست ءَ کُشگ بیتگیں ورنا احسان شاہ ءِ مات عارفہ شاہ ءِ دزبندی ءِ سر ءَ مروچی مستونگ شھر ءِ سرجمیں کار ءُ باری بُنجاہ، کارکیٹ ءُ کار ءُ باری پُرکاریاں ھمدردی ءِ واستا بند کتگ اَنت-

عارفہ شاہ ءِ گوشگ اِنت کہ منی شانزدہ سالی ئیں چُک احسان شاہ ایف سی ءِ کارندھاں تیرگواری ءَ چہ لک پاس مستونگ چیک پوسٹ سر ءَ شھید بیتگ، من انساپ ءِ واستا جتاجتائیں فورمز سر ءَ توار چست کتگ، بلے منی گپ گوشدارگ ءِ وتی جاہ ریاستی ادارھاں من آں بیھار داتگ ءُ زلیل کتگ-

آئی ءَ گوشتگ کہ من وتی چُک ءِ انساپ ھاتر ءَ شال پریس کلب ءِ دیم ءَ زھرشانی بُنجل ھم جتگ، بلے اود ءَ ھم منی پریات ءِ گوشدارگ جاہ پولیس کارندھاں من آں دزگیر کتگ تھانہ ءَ برتگ ءُ منی کھول ءَ ھوار من آں کُشگ ءِ بیھار داتگ-

عارفہ شاہ ءَ تچک کتگ کہ دانکہ منی چُک ءِ کوش ءَ ھمگرنچیں کارندھاں سزا دیگ نہ بنت منی اے جُھد برجاہ بیت-

زانگ بہ بیت کہ ھمے سال جون ءَ شال چہ مستونگ ءَ آیگ ءَ لک پاس نزیک ءَ پاکستانی پوج ءَ ورنا احسان شاہ تیرگواری کتگ کُشتگ-