بلوچستان ءِ دمگ چہ آواران ءُ پنجگور ءَ بیگواھیں دو مردمانی جون دست کپتگ اَنت کہ سیاسی جھدکارانی گْوشگ ءَ پاکستانی لشکر ءُ آھانی سلاہ بندیں ٹولی ءَ دزگیر کنگ ءَ پد بیگواہ بوتگ اَنت۔
دمگی مردمانی رد ءَ آواران ءِ جھمنندیں ورنا نواز بلوچ دو روچ پیش پاکستانی لشکر ءَ بنجل ءَ لوٹائینتگ بیتگ، چریشی ءَ پد آ بیگواہ بوتگ۔ آئی ءِ لوگ ءِ مردماں گْوشتگ کہ آئی ءِ لاش آدینگ ءِ روچ ءَ آواران ءِ دمگ ریکان ءَ دزکپتگ۔
ھمے رنگ ءَ حسن جان ء جان محمد ءِ چہ کیچ ءِ دمگ ھوشاب ءَ لھتیں روچ پیسر یک سلاہ بندیں گلے ءِ دست ءَ آوار جنگ بوتگ کہ دمگی ”ڈیتھ اسکواڈ “ ءِ نام ءَ زانگ بیت ءُ انسانی ھکانی جھدکارانی گشگ اِنت کہ آ سیکورٹی ادارھانی پلامرزی ءَ پرکار اِنت۔ آئی ءِ لاش آدینگ ءِ روچ ءَ چہ پنجگور ءَ دزکپتگ ۔
بلوچستان ءِ انسانی ھکانی گلاں دیر انت کہ زورانسری بیگواہ کنگ ءُ درکانودانی کوشانی ھلاپ ءَ زھر ءِ درشان ءَ کنگ ءَ انت۔ انسانی ھکانی ادارگانی رِد ءَ ھر سال چہ بلوچستان ءَ سداں مردمانی بیگواہ کنگ ءِ ھال دیم ءَ کیت۔