زورانسری بیگواھیانی ھلاپ ءَ نندانک: اسلام آباد پولیس ءِ اڑانک ءُ زھرشانی کنوکانی سر ءَ لٹ ءُ کٹ

اسلام آباد ءَ چہ بلوچستان ءَ زورانسری بیگواھی ءُ سیاسی دزگیریانی ھلاپ ءَ بلوچ کھولانی زھرشانی سِی ءُ یکمی روچ ءَ برجاہ-

چہ بلوچستان ءَ زورانسری بیگواھی ءُ بلوچ یکجھتی کمیٹی ءِ رھشونانی ناجائزیں دزگیر کنگ ءِ ھلاپ ءَ اسلام آباد ءَ بلوچ کھولانی زھرشانی مرچی سی ءُ یکمی روچ ءَ سر بیتگ بلے زھرشانی کنوک انگت پولیس ءِ نیمگ ءَ آزار ءُ اڑانک ءُ زوراکیانی آماچ اَنت۔

آدینگ ءِ روچ ءَ اسلام آباد پریس کلب ءِ دیم ءَ ”بی وائی سی ءِ رھشومانی ناجائزیں بندیگ کنگ ءُ زورانسری بیگواہ کنگ ءِ ھاندانانی شکایت“ ءِ سرھال ءَ یک کانفرنسے برجم بوگی بیتگ بلے کھولانی گْوشگ اِنت کہ اسلام آباد پولیس ءَ نہ ایوک ءَ سیمینار ءِ بندات کنگ ءَ چہ تھنا لھتیں کلاک پیسر جنین ءُ چُکانی سر ءَ اُرش کتگ بلکیں آ لٹ ءُ کٹ کتت انت ءُ شنگ ءُ شانگ کتگ انت-

پولیس ءِ نیمگ ءَ بلوچ کھولانی دارگ ءِ ھاترا اڑانک ایر کتگ انت ءُ پریس کلب ءِ نزیک ءَ چہ رؤگ ءَ داشتگ انت ءُ زالبول ءُ زھگ جتگ ءُ پولیس ءَ زالبولانی ھلاپ ءَ بدیں زبان کارمرز کتگ انت۔

کھولانی گشگ انت کہ اسلام آباد ھکومت ءِ جار ءِ پد ءَ اسلام آباد یک بندیگجاھے جوڑینتگ ءُ پر ایمنیں زھرشانی کنوکانی سر ءَ تاکت کارمرد کتگ انت-

بی وائی سی ءِ دزگیریں سروک مھرنگ بلوچ ءِ گھار نادیہ بلوچ ءَ ھمے درچ ءِ سر ءَ گْوشتگ کہ ما اتکگ اِیں پہ وتی زھرشانی ءَ ریکارڈ کنگ ءَ بلے لاچار بیتگ ایں جاگہ ءِ بدل کنگ ءَ ۔ گوستگیں روچ ءَ 14اگست ءِ درگت ءَ مئے مردمانی واستا راہ پچ بوتگ اَنت بلے مرچی کہ ما پریس کلب ءَ اتکگیں پد ءَ دراھیں راہ بند بوتگ اَنت۔

آئی ءَ گْوشتگ کہ نہ ایوک ءَ مارا بندیگ کنگ بوتگ انت بلکیں جنین ءُ چُکانی سر ءَ اُرش کنگ بوتگ، بدسلوکی کنگ بوتگ ءُ نوں پولیس ءِ مزنیں ٹولی یے جاڑیگ اِنت۔

چہ ایشی ءَ ابید پولیس ءِ اڑاند ءُ پریشانی ءَ ابید ھم بلوچ کھولاں وتی سیمینار برجم داشتگ کہ ایشی ءِ تہ ءَ انسانی ھکانی جھدکار، وکیل، نودربر ءُ بیگواھیں مردمانی کھولاں گپ جتگ۔

سیمینار ءِ تہ ءَ بلوچستان ءَ برجاھیں ریاستی زوراکی، زورانسری بیگواہ کنگ، درکانودی دزگیر کنگ ءُ انسانی ھکانی لگتمالی ءِ سر ءَ سرجمیں رنگ ءَ گپ ءُ تران کنگ بوتگ۔

گشتانک دیوکاں گوشتگ کہ پرامن زھرشانی ھمک شھری ءِ آئین ءِ ھک اِنت ءُ آئی ءِ چیرترینگ ءِ واستا زور ءِ کارمرد کنگ نہ ایوک ءَ ناجائز اِنت بلکیں انسانی شرپ ءِ ایراد کنگ اِنت۔

زھرشانی ءِ دھرنا ءَ بھر زوروکاں لوٹ کرتگ کہ زورانسری بیگواھی ھلاس کنگ بہ بیت، دزگیریں بلوچ رھشون زوت آمید گس ءَ پیش کنگ بہ بنت ءُ شھری آجوئیانی اھترامی دلجمی کنگ بہ بیت۔