بلوچستان : سے لاش دزکپتگ، لیویز کارندھے کُشگ بیتگ

بلوچستان ءِ جتاجتائیں دمگاں سے لاش دزکپتگ، وھدے کہ ناشناسیں مردمے ءَ تیرگواری کتگ یک لیویز کارندھے کُشتگ-

گیشیں ھالانی رِد ءَ بلوچستان ءِ دمگ کلات ءِ تھسیل جوھان ءِ ھند نرمک ءَ ناشناسیں مردمے ءَ تیرگواری کتگ لیویز ءِ کارندہ بھلو خان ء گدائی لھڑی جھمنند نرمک کُشتگ-

لیویز ءِ رِد ءَ تیرگواری ءَ پد دمگی انتزامیہ جاہ پہ جاھی سر بیتگ اَنت ، پہ اژدری کاروائی ءِ سرجم کتگ ءُ لاش کھول ءِ دست ءَ داتگ-

دومی نیمگ ءَ چہ گواندان ءَ ٹکی رھشون میر خضر حیات ء محمد حیات شاھوانی جھمنند اسکلکو ءِ لاش دزکپتگ، پولیس ءِ رِد ءَ اے مرد سلاہ بندیں مردماں لھتے روچ ءَ ساری چہ آئی ءِ لوگ ءَ آوار جتگ-

پولیس ءَ پہ اژدری کاروائی ءَ پد لاش کھول ءِ دست ءَ داتگ-

اوستہ محمد ءَ چہ کھیر تھر کینال ءَ گوستگیں روچ ءَ بیست پنچ سالی ئیں ورنا ءِ تیرسُپتگیں لاش کش اِتگ ءُ آئی ءِ پجّار دانیال کھوسہ ءِ نام ءَ چہ بیتگ کہ گوٹھ آدم کھوسہ جیکب آباد ءِ جھمنند گوشگ بیگ ءَ اِنت-

ھمے وڑ پشمبے ءَ شال ءِ دمگ چہ چمشہ اچوزئی ءَ پولیس ءَ یک ناشناسیں مردمے ءِ لاشے دزگپتگ ءُ نادُراھجاہ ءَ سر کتگ، اود ءَ پہ اژدری کاروائی ءَ پد پجّار ءِ ھاتر ءَ سردجاہ ءَ ایر کتگ-