اسلام آباد : بلوچ کھولانی نندانک ءَ یک ماھے سرجم

اسلام آباد ءَ زورانسری آوار جنی ءِ ھلاسی بیگواھیں مردمانی یل کنائینگ ءُ بلوچ یکجھتی کمیٹی ءِ رھشونانی یل کنائینگ ءِ لوٹ ءَ اسلام آباد ءَ برجاہ بلوچ کھولانی زھرشانی نندانک ءَ یک ماھے سرجم بیتگ-

پولیس ءِ نیمگ ءَ چہ نندانک ءِ دارگ ءِ ھاتر ءَ اڑان برجاہ چریشی ءِ سبب ءَ دلسیاھی ءِ دیمپان زھرشانی کنوکیں کماشیں زھرشانی کنوکانی جاور نگیگ بوتگ ءَ اَنت-

نندانک ءِ سروکی کنوکیں زورانسری بیگواھیں نودربریں رھشون شبیر بلوچ ءِ گْھار ءَ گْوشتگ کہ سیما بلوچ اے درگت ءَ گوشتگ کہ مروچی اسلام آباد ءَ شاتکامی ءِ اوگام ءُ سوتاں چہ جکستگ درست گوں وشی ءَ لزت گرگ ءَ اَنت بلے مئے واستا اے روچ ھم مدامی روچانی وڑ ءَ تُرسینگ ءُ بیھار ءَ چہ سرریچ اِنت-

آئی ءَ گوشتگ کہ ما وتی بیگواھیں دوستناکانی یل کنائینگ ءُ وتی سرجمیں لوٹانی سرجم کنگ ءَ تاں اد ءَ چست نہ بہ ایں-

زانگ بہ بیت کہ چہ بلوچستان ءَ زورانسری آوار جنی ءِ ھلاپ ءُ بی وائی سی ءِ دزگیریں سروکانی یل کنائینگ ءِ ھاتر ءَ کھول نیمگ ءَ چہ یک ماھے ءَ اسلام آباد ءَ نندانک برجاہ ءَ اِنت، وھدے کہ اے میان ءَ پولیس ءِ نیمگ ءَ چہ زھرشانی کنوک سلام آباد پریس کلب ءَ روگ ءُ اود ءَ بُنجل ءِ جنگ ءَ چہ داشتگ اَنت-

اسلام آباد نندانک ءَ نشتگیں مردمانی لوٹ اِنت کہ بلوچ سیاسی رھشون ڈاکٹر ماہ رنگ بلوچ، بیبگر زھری، بیبو، گلزادی، شاجی صبغت اللہ، ماما غفار ءُ عمران بلوچ ءَ زوت یل کنگ بہ بنت، بلوچستان ءَ زورانسری آوار جنی ءُ سیاسی کارکنانی دزگیری ءِ دْرچ ءَ بند بکن اِت ءُ سرجمیں بیگواھیں مردماں دیم ءَ بیار اِت-