پاکستان ءِ بنجاھی شھر اسلام آباد ءَ مروچی بیست ءُ پنچمی روچ ءَ بلوچ کھولانی زھرشانی برجاہ بیتگ-
گوستگیں بیست ءُ پنچ روچاں بلوچ یکجھتی کمیٹی ءِ بندیگیں رھشون ءُ بیگواھیں مردمانی ھاتر ءَ کھولانی زھرشانی ماں اسلام آباد ءَ برجاہ انت-
زھرشانی کنوکاں گوشتگ بیست ءُ پنچ روچاں ترندیں گرم ءُ دگہ سکیانی ھواری ءَ پولیس ءَ داں انگت ءَ آیاناں شریں ساھگے ءِ اڑ دیگ ءِ اجازت نہ داتگ انت-
آیانی گوشگ انت کہ اے بیست ءُ پنچیں روچانی گوزگ ءَ ابید ھم اسلام آباد ءِ واکداراں پریس کلب ءِ راہ پہ مئے واستا پچ نہ کتگ انت-
آیاں گوشتگ راہ ءُ دگہ آسراتی وتی جاہ ءَ بلے ما ھمک روچ ترس ءُ بیھارانی دیمپان انت-
زانگ بہ بیت گوستگیں بیست ءُ پنچ روچاں بلوچ یکجھتی کمیٹی ءِ رھشون ءُ اَچ بلوچستان ءَ بیگواھیں مردمانی ھاتر ءَ ماں اسلام آباد ءَ زھرشانی بوگ ءَ انت بلے آیانی گپانی گوشدارگ ءَ تنی وھدی ھاسیں رنگے ءَ کس نیتکگ –
دومی نیمگ ءَ اَچ لیاری ءَ سیادی داروکیں زاھد علی ءِ بیگواھی ءِ ھلاپ ءَ ماں کراچی پریس کلب ءَ ڈن پنچمی روچ ءَ زھرشانی نندانک برجاہ انت-

زاھد علی ھمے سال ءِ ھبدہ جولائی ءَ ماں لیاری ءَ وتی رکشہ ءَ ھوار آوار جنگ ءُ بیگواہ کنگ بیتگ- کھول ءَ گوشتگ بیست ءُ چار روچ ءِ گوزگ ءَ ابید ھم مارا آئی ءِ بارو ءَ ھچ وڑیں سرپدی دیگ نہ بیتگ انت-
کھول ءَ گوشتگ زاھد علی کراچی یونیورسٹی ءَ میان اُستمانی تَک ءِ نودربرے ءُ وتی موکلانی وھد ءَ رکشھے ئِے چلائینتگ ءُ کھول ءِ گزران ءَ کنگ ءَ بوتگ-