کراچی لیاری ءِ نندوکیں ورنائیں زاھد بلوچ 17 جولائی ءُ 2025 ءَ زورانسری بیگواھی ءَ پد آئی ءِ لوگ ءِ مردماں کراچی ءِ پریس کلب ءَ چہ ڈن زھرشانی بنجلے جتگ ءُ نشتگ اَنت۔
کھول لوٹ اِنت کہ زاھد بلوچ ءَ زیت ءَ چہ زیت آجو بہ کن اَنت ءُ زمہ داراں کانون ءِ درچ ءَ بیار اَنت۔
زاھد ءِِ پت عبدالحمید بلوچ سک بیمار اِنت ءُ دانکہ دیر ءَ نندگ ءِ کابل نہ اِنت ایشی ءَ چہ پد وتی چک ءِ آجوئی ءِِ واستا بنجل ءَ نشتگ آئی ءِ گوشگ اِنت کہ زاھد ءَ گوں ھچ وڑیں گیر کانونی سر ءُ چیراں نزیکی نیست، آ یک پرامن، کانوندار ءُ وانندھیں ورنایے آئی ءَ انی کراچی یونیورسٹی ءَ میان اُستمانی تک ءِ گریجویشن سرجم کتگ۔
عبدالحمید بلوچ ءَ گیشتر گوشتگ کہ مالی تنگ دستیاں ابید زاھد ءَ رکشہ چلائینتگ ءُ وتی لوگ ءِ ھرچانی ڈبہ زرتگ ءُ آئی ءَ سابت کتگ کہ آ مھنت کش ءُ ازت داریں شھری یے ۔
زاھد ءِ بیگواھی ءَ پد وھدیکہ آئی ءِ پت ءَ نزیکیں تھانہ ءَ رپورٹ ءِ درج کنگ ءَ شتگ گڑا پولیس ءَ رپورٹ ءِ نبشتہ کنگ ءَ انکار کتگ چریشی ءَ ھاندان ء گیشتر تور اِتگ۔
زاھد ءِ لوگ ءِ مردم ءَ زھرشانی بنجل ءَ ھوریں مردماں انسانی ھکانی گل، اھوالکار ، سیاسی باسک ءُ مھلوک ءَ چہ گوں لوٹ کتگ کہ آ زاھد بلوچ ءِ آجوئی واستا آھانی ھمراھی ءَ بوشت اَنت ءُ آھانی آواز ءَ برز بہ کن اَنت ۔
کھول ءَ گوشتگ کہ زھرشانی بنجل ھما وھد ءَ دانکہ برجاہ اِنت دانکہ زاھد بلوچ ءَ گوں ھپازت ءَ دیم ءَ نیار انت ۔