اسلام آباد : بلوچستان ءَ آمیدگسی آئینی لوٹاں ابید ریاستی زورانسری پژدر ءَ پیسلہ کنگ بیت انت- بلوچ زھرشانی کنوک

بی وائی سی ءِ رھشونانی یل کنگ ءِ ھاتر ءَ زھرشانی برجاہ، کھولاں پریس کانفرنس ، آمید گس ءِ کارروائی ، پولیس ءِ آزار ءُ اذیت ، ءُ ریاستی نادلگوشیانی سر ءَ زھر ءِ درشان کتگ-

بلوچ یکجھتی کمیٹی ءِ رھشونانی کھول ءُ زورانسری بیگواھی ءِ آماچیں مردمانی کھول ءَ 3 اگست 2025 ءَ اسلام آباد ءَ یک ھاسیں پریس کانفرنسے برجم داشتگ ءُ 19 روچ ءِ دھرنا، آمید گس ءِ کارروائی، پولیس ءِ پاتراپ ءُ ریاستی بے وسیانی سر ءَ زھر ء درشان کتگ-

پریس کانفرنس ءِ بندات ءَ گشتانک دیوکاں گشتگ کہ ما اے وھد ءَ اسلام آباد ءَ پچیں آزمان ءِ چیر ءَ نشتگ انت، ھور ، سکیں گرم ، ءُ ریاستی پاتراپاں ابید ، ایوک ءَ وتی نزیکیں مردمانی سلامتی ھاترا وتی توار ءَ چست کنگ ءَ ایں ۔ اے زھرشانی پہ ھچ وڑیں سیاسی ءُ زاتی سیتانی ءَ نہ اِنت بلکیں پہ ھما مردمانی یلہ کنگ ءَ اِنت کہ آ ریاستی بندیگی ءَ اَنت کہ آھانی ھچ وڑیں کانونی جرم ءِ گناہ سابت نہ بوتگ۔

پریس کانفرنس ءَ گوستگیں روچ ءَ شال ءِ انسداد ناشرکاری آمید گس ءَ ڈاکٹر ماہ رنگ بلوچ، بیبو بلوچ، گلزادی، ماما غفار، شاھجی، ءُ بیبرگ بلوچ ءِ پیشی ءِ ھوالہ ءَ گشتانک دیوکاں گشتگ کہ پولیس ھچ وڑیں پدریں سبوت پیش نہ کنت، ایشی ءِ ابید ھم آمید گس ءَ یک رندے پد ءَ آھانی جسمانی ریمانڈ 20 روچ ءِ واستا گیش کتگ۔ قانونی زانتکارانی ھیال انت کہ اینٹی ٹیررزم ایکٹ ءِ رد ءَ 14 روچ ءَ چہ گیش ریمانڈ ایوک ءَ الکاپیں منانکانی بنیاد ءَ ممکن انت کہ اد ءخ دست نہ کپ ایت-

کھولاں گْوشتگ: بلوچستان ءِ آمیدگس آئین ءِ لوٹ ءُ گزرانی بدل ءَ ریاستی زور ءِ چیر ءَ پیسلہ کنگ ءَ اَنت ءُ انساپ ءِ امل چیرداتی سازمان ءِ تہ ءَ جوڑ کنگ بیتگ۔ کانون ءِ اولی زمہ واری شھری ءِ بنیاتی ھکانی پد جنگ انت بلے ادا آمیدگس ریاستی زلم ءُ زوراکی ءِ تہ بے توار ءُ ھواری ءَ گون انت۔

پریس کانفرنس ءَ اسلام آباد پولیس ءُ دمگی انتزامیہ ءِ گیر انسانی رویش ءِ سر ءَ م سک باز ایراد گرگ بوتگ۔ گشتانک دیوکاں گشتگ کہ بلوچ نودربر ءُ دھرنا ءَ بھر زورکیں ورنا تنگ کنگ بیگ ءَ انت، آہانی کھول ءِ سر ءَ زور دیگ بوگ ءَ انت، دھرنا ءِ ھلاس کنگ ءِ واستا زور کارمرز کنگ ءِ کوشست کنگ بوتگ، اگاں چہ زھرشانی سرجم ءَ امن ءُ ایمنی ءِ راہ ءَ انت۔

اسلام آباد ءِ شھریان چہ پھلی ءِ درشانی کنان ءَ ھواریں مردماں گوشت کہ اگاں مارا پریس کلب ءِ دیم ءَ زھرشانی کنگ ءِ اجازت بوتیں گڑا لس مھلوک ءَ ھچ وڑیں جیڑھ ءُ جنجال نہ بیتگ ات۔ بلے انتزامیہ ءَ راہ بند کتگ انت ءُ مارا راہ ءِ سر ءَ نندگ ءَ مجبور کتگ۔ گشتانک دیوکاں اے گپ پدر کت کہ سڑک ءِ بند کنگ ءِ اسل زمہ واری دھرنا ءِ نہ انت بلکیں ریاستی ادارھانی ئیگ انت۔

ھواریں مردماں لوٹ کتگ کہ اسلام آباد انتزامیہ ءَ را پریس کلب ءِ دیم ءَ نندگ ءِ اجازت دیگ بہ بیت دانکہ شھریاں دگہ مشکلانی آماچ مہ بنت ءُ زھرشانی ءِ توار رسانکدر ءُ واکداراں شریں رنگے ءَ سر بہ بیت۔

پریس کانفرنس ءِ تہ ءَ چہ درستیں سیاسی گل، انسانی ھکانی گل، وکیل ءُ سول سوسائٹی ءَ دزبندی کنگ بوتگ کہ آ اے انسانی جیڑہ ءِ سر.ءَ وتی توار ءَ چہ زاتی ءُ پارٹی مپاداں بُرز بہ کن انت۔ گشتانک دیوکاں گوشت کہ اے ایوک ءَ بلوچ ءِ جیڑھے نہ اِنت بلکیں پہ ھمک شھری ءِ جیڑھ اِنت کہ آ وتی لبزانک ءُ زھرشانی ءِ آزاتی ءِ ھک ءَ چہ زبھر کنگ بیگ ءَ اِنت۔

پریس کانفرنس ءِ گڈسرا ھاندان ءَ تچکیں کلوہ دات کہ داں بلوچ یکجھتی کمیٹی ءِ سروک زوت ءُ بے شرت ءَ آجو مہ بنت ما اے دھرنا ءَ یلہ نہ کن ایں۔ اگاں ریاست وتی برزمانی ءَ برجاہ بہ دار ایت گڑا اے تھریک گیشتر برانز دیگ بیت انت، توار گیشتر بنت ءُ راج ءِ ھمایت گیش بیت۔ مئے سبر ءَ نزوری ءِ رد ءَ مہ لیک اِت۔