اسلام آباد ءَ نیشنل پریس کلب ءِ دیم ءَ بلوچ کھولانی پرایمنیں زھرشانی مرچی 17می روچ ءَ برجاہ بیتگ۔ سر پچیں آسمان ءِ چیر زھرشانی کنوکیں مردم بلوچ یکجھتی کمیٹی ءِ دزگیریں رھشونانی زوت یل کنگ ءُ بلوچستان ءَ زورانسری بیگواھی ءِ ھلاسی ءِ لوٹ ءَ کنگ ءَ اَنت۔ زھرشانی کنوکیں مردمانی گْوشگ اِنت کہ بیگواھیں مردم آمیدگساں پیش کنگ بہ بنت دانکہ آئین ءِ رد ءَ آھاں انساپ بہ رس اِیت ۔
زھرشانی کنوکاں گِلگ کتگ کہ دو ھپتگ ءَ گیش گوزگ ءَ ابید اسلام آباد انتزامیہ ءَ آھاں ترندیں گرم ءَ کیمپ جوڑ کنگ ءِ اجازت نہ داتگ۔ پریس کلب ءِ نیمگ ءَ روگ ءِ راہ انگت ءَ گوں بس ءُ بُروکیں تاراں بند اَنت کہ زھرشانی چہ مھلوک ءِ چماں پُشت ءَ بہ بیت۔
آیاں گوشتگ مئے لوٹانی گوشدارگ ءِ بدل ءَ مارا آزار دیگ بوگ ءَ اِنت۔ “انٹیلی جنس ءِ کارندہ ھر روچ مئے رندگیری ءَ کن اَنت، ویڈیو جوڑ کن اَنت ءُ نسلی بنیاد ءَ مارا نشانگ جوڑ کن اَنت، بازیں کارندہ رسانکدر ءِ نمائندہ ءِ بستار ءَ کاینت ءُ زھرشانی کنوکاں ریکارڈ ءُ ترس ءُ بیم ءِ آماچ کن اَنت۔”
مرچی اسلام آباد ءَ آئین پاکستان ءِ نیمگ ءَ برجم داشتگیں آل پارٹی کانفرنس ءَ گوں تران کنان ءَ ایڈووکیٹ نادیہ بلوچ ءَ بلوچ یکجھتی کمیٹی ءِ دزگیریں زھشونانی یل کنگ ءِ لوٹ ءِ پد ءَ زور داتگ ءُ بلوچستان ءَ انسانی ھکانی ناگیگیں جاور ھال ءِ سر ءَ چمشانک دیگ ءِ کڈنی۔
“جاور انچیں جاہ ءَ سر بوتگ کہ آئین کہ پہ شھریانی رکینگ ءَ جوڑ کنگ بوتگ، نوں بلوچستان ءَ برجاھیں زلم ءُ زوراکی ءَ کانون ءِ درچ گوشگ انت-
نادیہ بلوچ ءَ ھم جوڈیشل سسٹم ءِ سر ءَ سک باز ایراد گپتگ ءُ گْوشتگ: سرجمیں جوڈیشل سسٹم بھا بوتگ، باندا مھرنگ بلوچ ءِ کیس ءِ گوشدارگ اِنت ءُ ما زانیں کہ آ یک رندے پد ءَ ریمانڈ ءَ دیم دیگ بیت۔
آئی ءَ اے جست چست کتگ کہ منی گھار ءُ آئی ءِ ھمراھانی سر ءَ پراکسی ءِ بھتام جنگ بوگ ءَ اِنت اگاں چوش اِنت گُڑا آ پرچا 3 ماہ ءُ 15 روچ ءَ ایم پی او ءِ چیر دستی ءَ دارگ بوگ ءَ اَنت اگاں سرکار ءِ گور ءَ سبوت ھست گُڑا آمیدگسانی دیم ءَ پرچا پیش کنگ نہ بنت؟