یار دوستین جان واتر بکن
نبشتہ کار: بادل بلوچ
دی بلوچستان پوسٹ
مرگ چوناها ھر ساهدار ءِ سر ءَ پرز اِنت بلے دریگتیں تئی وڑیں پُلے چو اشتاپی ءَ مہ شُتیں ترا یات بیت دوستین جان من ءُ تو چونیں چونیں ٹُوٹل جت کہ اے رنگ ءَ کن ایں دژمن ءَ اے رنگ ءَ جن ایں بلے چی کن ئے باندات ءِ جنگ اِنت من هم هست نہ باں گُڈّی تیر باں یا دژمن ءِ ٹوپانی دیم ءَ جنگ دیان باں پہ ترا کایاں۔
دوستین جان ترا یات اِنت من ءُ تو دگہ لھتیں سنگت پہ دژمن ءِ جَنگ ءَ شُت ایں آ دگہ سنگتاں گُشت همد ءَ چہ جاگہ برابر اِنت تو گُشت مروچی چہ بُنجل ءِ دیوال ءَ جن ایں گڑا تئی گپ ما زُرت چہ دژمن ءَ باز نزیک شُت ایں اے جنگ ءَ دژمن ءِ چار سپاهیگ مُرتگ اَت داں دو ادار ءَ جنگ دات دژمن ءَ پد دات چہ بُنجل ءَ تو گوں تُرندیں جاکاں گُشت “بوشت بوشت مہ تچ” ءُ پد ءَ زور ءَ گوں ٹهک دات کہ سنگتاں بیا اِت نوں بس اِنت پاکستان ءَ پورہ گُش ئے شپ ءَ آروسی دیوان اَت۔
دوستین جان ترا یات اِنت من تو دگہ سے سنگت پنچ روچی سپرے ءَ رپت ایں پنچُمی روچ ءَ مئے آرت، روگن، دال کُٹ اِت اَنت من ءُ تو سُهب ءٍ هپت بج ءَ در آتک ایں پہ سامانانی واستا سرجمیں روچ پند کُت شپ ءِ هشت بج ءَ ھمے سامان سنگت ءِ ھوار اِت اَنت من تو چار بڈی کُت اَنت سے کیلو گوشت گون اَت تو گُشت نہ ور اَنت اِش اوتاک ءَ سنگت شُدیگ اَنت شپ زمستان اَت تُرندیں گوریچ کشگ ءَ اَت من ءُ تو سپر جت شپ ءِ دو بج ءَ یک کُوٹی یے ءَ وت ءَ سر کُت تو گُوشت چار اِش گهیتگ اَنت ورگ ءِ وڑ ءَ نہ اَنت من ءُ تو دو روچ لنگڈیں لاپ ءَ وتارا اوتاک ءَ سر کُت منی ءُ تئی وراک بس دو بسکوٹ اِت اَنت۔
دوستیں جان کُجام کسہ ءَ بکناں ؟
کُجام لھڑیں درداں ایر براں؟
دوستین جان بیا ترا سنگت لوٹگ ءَ اَنت یار واتر بکن-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-