بلوچستان ءَ پاکستانی لشکر ءِ سر ءَ یکشل ءَ ھمک روچ اُرش بوگ ءَ انت کہ چرے اُرشانی سبب ءَ سرکار ءَ شپ ءَ بازیں راھانی سر ءَ ٹرانسپورٹراناں روگ ءِ بندش جتگ-
بلوچستان ءِ بنجاھی شھر شال ءُ ڈھاڈر ءَ پولیس تھانہ ءُ پاکستانی لشکر بمب تراک ءُ سلاہ بندیں اُرشانی نشانگ جوڑ کنگ بیتگ اَنت۔
گوستگیں شپ ءَ ناشناسیں اُرش کنوکاں شال ءِ رودراتکی شھدگ ءِ سر ءَ پولیس تھانہ گوں دستی بمب ءَ نشانگ جوڑ کتگ ءُ شُتگ اَنت۔
پولیس ءَ تراک ءِ ھال راست کتگ ءُ گشتگ تراک ءِ آسر ءَ یک گاڑی یے ءَ را تاوان رس اتگ ۔
دومی نیمگ ءَ ڈھاڈر ءِ دمگ سنی سوران ءَ پاکستانی لشکر ءِ مزنیں کیمپ ءِ سر ءَ سلاھ بندیں مردماں اُرش کتگ ۔
دمگی مردمانی رد ءَ اے اُرش ءَ کیمپ ءِ مستریں دروازگ ءَ اوشتاتگیں کارندہ نشانگ جوڑ کنگ بوتگ اَنت کہ ایشی ءِ آسر ءَ لشکر ءَ را تاوان رس اتگ ءُ اُرش ءَ پد لشکر ءَ مزنیں تیرگواری ءُ مارٹر ءِ گولہ باری کتگ۔