بلوچستان ءِ جتا جتائیں دمگاں چار شمبے ءِ روچ ءَ زالبول ءُ جنکانی ھلاپ ءَ ناگیگیں بازیں ویل رپورٹ بیتگ انت- کہ آھانی تہ ءَ دو سالیں جنکانی بیرانی، یک جنکے ءِ سر ءَ زوراکی ءِ گمان ءُ زمین ءِ جیڑہ ءِ سر ءَ یک جنینے ءَ ھوار چار مردمانی ٹپیگی ھوار اَنت۔
گیشیں ھالانی رد ءَ شال ءِ دمگ کلی بنگلزئی ءَ چہ دو کسان سالیں جنکانی گونی بندیں لاش دزکپتگ انت کہ آھانی گمانی رنگ ءَ آیانی گٹ دارگ ءُ کشگ بیتگ انت۔ پولیس ءِ رد ءَ بیران بوتگیں جنکانی پجار 3 سالی ئیں بی بی میراب ءُ 7 سالی ئیں بی بی یسرا ءِ نام ءَ بوتگ انت۔
لاش سول ھسپتال ءَ سر کنگ بوتگ انت کہ اود ءَ پولیس ءِ سرجن ڈاکٹر عائشہ فیض ءَ پوسٹ مارٹم کتگ انت۔
بنداتی رپورٹ ءَ گشگ بوتگ کہ مرگ ءِ سبب ساہ ءِ بند بوتگ۔ پولیس ءَ وئیل نبشتہ کتگ ءُ وئیل ءِ پٹ ءُ پول بندات کتگ ۔ بیران بوتگیں جنکانی مات ءُ پت ءَ ھوار نزیکیں سیاد ءُ وارساں جست ءُ پرس کنگ بوھگ ءَ اِنت۔ واکدارانی گشگ ءِ رد ءَ اے وئیل ءِ پُشت ءَ مات ءُ پت ءِ جتا بوھگ ھم بوت کنت۔
شال ءِ دمگ خروت آباد ءَ 17 سالی جنک ءَ وتی پت ءِ سر ءَ جنسی زوراکی ءِ بھتام جنگ ءَ تھانہ ءَ کیس درج کتگ۔ پولیس ءِ رد ءَ اے جنین ءَ وتی مات ءِ ھمراھی ءَ بیان ریکارڈ کتگ ایشی ءَ پد ملزم عبدالمنان دزگیر کنگ بوتگ ءُ ڈی این اے ءِ نمونگ زورگ بوتگ اَنت۔
دیمتر ءِ پٹ ءُ پول چہ دمگی انتزامیہ ءُ پولیس ءَ کنگ بوھگ ءَ انت۔
دومی نیمگ ءَ مستونگ ءِ شھر شریف آباد کھڈ کوچہ زمین ءِ جیڑہ ءِ سر ءَ دو گلانی نیام ءَ وت مہ وتی جنگ ءُ جیڑہ بوتگ کہ ایشی ءِ تہ ءَ یک جنینے ءَ ھوار چار مردم ٹپیگ بوتگ اَنت۔ جنگ ءِ وھد ءَ لٹ ءُ سنگ جنگی بیتگ انت-
ٹپی بیتگینانی تہ ءَ حاجی عبدالقیوم شاھوانی، حاجی محمد رحیم، تاج محمد ءُ یک جنینے ھوار اَنت کہ آ شھید نواب غوث بخش رئیسانی نادراھجاہ ءَ سر کنگ بوتگ اَنت۔
لیویز فورس ءَ اے وئیل ءِ پٹ ءُ پول بندات کتگ ۔