بلوچستان ءِ دمگ ھزدار ءِ ھند نال ءَ پاکستانی لشکر ءَ بلوچ اسٹوڈنٹس آرگنائزیشن (آزاد) ءِ پیسریگیں چیئرمین ءُ بیگواہ کتگیں رھشون زاھد بلوچ ءِ ناکوزتک زورانسری بیگواہ کتگ-
بیبرگ بلوچ ء عبدالمالک جھمنند اسد نور مارکیٹ نال 30 جولائی ءَ بیگاہ ءِ شش ءِ نزیک ءَ پاکستانی لشکر ءُ انٹیلی جنس ادارھانی دست ءَ دزگیر ءُ زورانسری بیگواہ کنگ بوتگ۔ بیبرگ بلوچ سرکاری کارمندے ۔
زانگ بہ بیت کہ گوستگیں یازدہ سالاں بلوچ نودربر رھشون زاھد بلوچ زورانسری بیگواہ کنگ بیتگ ءُ آئی ءِ برات شاہ جان بلوچ ھمے سال ءِ مارچ ءَ ماں نال ءَ روچ ءِ رھمانی ءَ کُشگ بیتگ۔
بلوچ سیاسی ءُ چاگردی تک ءُ پھناتانی گْوشگ اِنت کہ پاکستانی لشکری زوراکیں بیگواھی مُچانکی سزا ءِ دروشم ءَ کارمرز کنت۔
بلوچستان ءَ زورانسری بیگواھی گیش بوتگ ۔ گْوستگیں 38 کلاکانی تہ ءَ زورانسری بیگواہ کنگ ءِ شانزدہ ءَ چہ گیش کیس دیم ءَ اتکگ اَنت۔
زورانسری بیگواھی ءُ بلوچ یکجھتی کمیٹی ءِ سروکانی یل نہ کنگ ےِ ھلاپ ءَ بلوچ کھول دو ھپتگ اِنت کہ اسلام آباد ءَ زھرشانی کنگ ءَ اَنت۔ مرچی ھمے درگت ءَ سوشل میڈیا ءِ سر ءَ سرپدی مھممے ءِ جار جنگ بیتگ ۔