بلوچستان ءَ دگہ ھپت مردم ءِ بیگواھی ءِ کیس نکش کنگ بیتگ اَنت

بلوچستان ءَ ھمکروچی ھساب ءَ زورانسری آوار جنی ءِ وئیل دیم ءَ آیگ ءَ اَنت، آیانی تہ ءَ لَس شھری ، دکاندار، ڈرائیور، سرکاری کاردار ءُ نودربر نشانگ کنگ بیگ ءَ اَنت- گوستگیں سی شش کلاکانی تہ ءَ دست کپتگیں کچ ءُ کساس ءِ رِد ءَ پاکستانی پوج ءَ دگہ ھپت مردم آوار جتگ ءُ بیگواہ کتگ اَنت-

گیشیں ھالانی رِد ءَ چہ پنجگور ءَ فٹبال گراؤنڈ ءَ پاکستانی پوج ءَ دو ورنا آوار جتگ ءُ بیگواہ کتگ اَنت-

کھول ءِ رِد ءَ نزیر احمد زھری ء صوبت خان ءُ اصغر مینگل ء محمد وارث پاکستانی پوج ءَ پنجگور فٹبال گراؤنڈ ءَ ساھت شش ءِ وھد ءَ زورانسری آوڑ جتگ ءُ بیگواہ کتگ اَنت چریشی ءَ پد آئی ءِ درگت ءَ ھچ وڑیں ھال دز نہ کپتگ- آئی ءِ کھول ءِ مردماں گوشتگ کہ اے ورناھاں یل بہ کن اَنت کہ بے سبب ءَ آوار جتگ ءُ بیگواہ کتگ اَنت چریشی ءَ پد ما گوں درد ءُ گماں گوازینگ ءَ ایں-

ھمے وڑ پاکستانی پوج ءَ سجاد نور ء نور محمد جھمنند مشکے بازار ، آواران بیست نُھ جولائی ، نیمروچ دوازہ ءَ امان اللہ ء خُدا رحیم جھمنند جمال آباد ، نوشکی بیست پنچ جولائی ءِ شپ ءِ ساھت دو ءَ ، شبیر احمد ء عبدالسلام جھمنند جمال آباد ، نوشکی بیست پنچ جولائی ، شپ ءِ ساھت دو ءَ ، سرکاری کاردار بیبرگ بلوچ ء عبدالمالک جھمنند اسد نور مارکیٹ ، نال سی جولائی بیگاہ شش ءَ آوار جتگ ءُ بیگواہ کتگ اَنت-

اشی ءَ اَبید نظام بلوچ ء عبدالرحیم جھمنند سرینکن تمپ بیست ھپت جولائی، نیمروچ دوازدہ نیم ءَ پاکستانی پوج ءَ آوار جتگ ءُ ناشناسیں جاھے ءَ برتگ-

زانگ بہ بیت کہ بلوچستان ءَ ھمکروچی ھساب ءَ زورانسری آوار جنی ءِ کیس نکش بیگ ءَ اَنت بلے باز انچیں دمگاں کہ وھد سر ءَ کیس دیم ءَ نیا اَنت کہ کھول ءِ سر ءَ ریاستی زور بیت، ھمے ھاتر ءَ تچکیں کچ زانگ نہ بنت- بلے انّگیں لھتے ماھاں زورانسری آوڑ جنی یک تُرسناکیں وڑے ءَ گیشی گندگ اتکگ-