نمدی یے پہ نمیرانیں قیصر امجد ءَ
نبشتہ کار: ھمل نور
دی بلوچستان پوسٹ
قیصرجان من ءَ یات نہ کنت من ترا کجا زانتگ بلے من ءَ یات اِنت بلوچ سینما دیوان ءَ منی ءُ تئی ھال ءُ اھوال بیتگ، بلوچ سینما انچیں دیوانے کہ اود ءَ یک تامر سوجکارے دومی تامر ءِ سوجکار ءَ زانت اے بلوچ سینما ءِ برکت بیتگ کہ تو مئے وڑیں نزانتکاریں مردم ھم زانتگ اَنت قیصرجان منی کسانیں جھدے اَت کہ من بلوچ سینما ءِ ردوم ءِ سر ءَ نبشتہ بہ کن آں من باز مردم استاد جست کت اے بابت ءَ باز استاد ءَ من ءَ باز دلڈی دات سکین دات کہ اے جوانیں کارے تو کنگ ءَ ئے مئے کر ءَ ھرچ مدت کہ لوٹ ئے ما ترا کن این ءُ تو ھرچ جستے کن ئے ما زانیں ترا آ جستانی جواباں دے ایں من باز گل بیتاں کہ من ءَ دلبڈی ءُ سکین رس اِت اے وڑیں کار کنگ ءِ ترا یات بیت کہ من تئی کر ءَ ولی رئیس ءِ نمبر لوٹ اِت تو گشت من ءَ گون نہ اِنت پد ءَ من شکیل مراد ءِ کر ءَ پچ گپت قیصر جان منی ارادہ اَت کہ من ترا ھم بلوچ سینما ءِ ردوم ءِ بابت ءَ باز جست بہ کن آں چے ءَ کہ شما بلوچ سینما ءِ بنداتی مردماں گون بیتگ ئے تئی مسرتیں برات واجہ نمیرانیں زیا برک مکران ءِ اولی بلوچی تامرساچ اِنت من ءَ امیت اَت کہ تو بلوچ سینما ءِ ردوم ءِ سر ءَ مارا باز چیز گوشتگ اَت بلے بد بھتی ءَ بچار تو مارا یل دات ءُ شت ئے تئی روگ پہ بلوچ سینما ءَ مزنیں تاوانے اَت مئے تامرساچانی دو دیوان بیتگ اَنت یکے بلوچ سینما بیتگ یکے سنگت پروڈکشن بیتگ تو مدام ھر سھب وتی سلام دوئیں دیواناں دیم داتگ-
بلے قیصرجان تو گروریں مردمے نہ بیتگ ئے تو گروری ھچ نہ کتگ مئے مردم چار دانگ گپ سکی تامرساچی ءِ بابت ءَ آئی ءِ تہ ءَ گرور مان بیت من درستاں چہ شرتر آں بلے تو تامر ساچی ءِ بابت ءَ باز چیز زانتگ بلے تو گرور نہ کتگ تو مدام وتی تامر نگد ءِ واستا دیوان ءَ ایر کتگ اَنت مئے وڑیں نہ زانتکارے ءَ گپ جتگ تو آئی ءِ گپانی اھترام کتگ-
مئے کر ءَ یک رویہ ءِ ھست اگاں کسے ءَ تامرے ءِ سر ءَ گپ جت گڑا آ مردم ڈوبارگ بیت مئے لھتیں مردم نگد برداشت نہ کنت بلے تو چو نہ بیتگ ئے برے برے مئے تامر ھم دیوان ءَ نگد ءِ واستا ایر بیتگ اَنت تو مئے تامرانی سر ءَ گپ کتگ مارا سر ءُ سوج ھم کتگ-
یک رندے من ءَ یات اِنت من گوشت من تئی لوگ ءَ کایاں تو گشت شر اِنت ھر وھد ءَ کائے منی نمبر ھمیش اِنت من ءَ پون بہ کن من تئی ملگ ءَ دلمانگ اِتاں ءُ دگہ گپے من گوں تو یک کسانیں لکین تامرے کنگ ءَ دلمانگ اِتاں بلے من ترا ھال نہ دات گپ باز اَنت یات باز اَنت بلے قیصرجان تو مدام یات کا ئے۔ بھشت ءَ بات ئے قیصر جان-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-