نوشکی : پاکستانی پوج ءِ دست ءَ ورنایے زورانسری بیگواہ

بلوچستان ءَ زورانسری آوار جنی ءِ درچ برجاہ، چہ نوشکی ءَ مروچی پاکستانی پوج ءَ یک ورنایے بیگواہ کتگ-

گیشیں ھالانی رِد ءَ حفیظ اللہ ء پیر محمد جھمنند قاضی آباد نوشکی مروچی چی لوگ ءَ آوار جتگ ءُ زورانسری بیگواہ کتگ-

کھول ءَ آئی ءِ پہ سلامتی یل کنائینگ لوٹ کتگ-

اشی ءَ اَبید چہ کیچ ءَ دگہ دو مردم ءِ زورانسری آوار جنی ءِ کیسز نکش بیتگ- کھول ءِ رِد ءَ قمبر بلوچ ء نور جان، اُمر شانزدہ، کہ یک دکانے ھست، 23 جولائی ءَ بیگاہ ءِ چار ءَ تربت ءِ دمگ چہ جوسک ءَ پاکستانی ملٹری انٹیلیجنس ءُ انٹر سروسز انٹیلیجنس ءِ کارندھاں آوار جتگ ءُ بیگواہ کتگ- قمبر بلوچ ءِ سیادی بلیدہ، کیچ ءِ ھند صاحب خان بازار ءَ اِنت-

ھمے وڑ عمران خان ء تاج محمد، اُمر بیست شش سال، کہ یونیورسٹی آف تربت ءِ انسٹیٹیوٹ آف بلوچ لینگویج اینڈ کلچر ءِ نودربرے ھمے سال بیست ھپت جون ءِ نیمروچ ءَ فرنٹیئر کور ءُ ملٹری انٹیلیجنس ءِ کارندھاں آوار جتگ – عمران خان ءِ سیادی سری کلگ، گورکوپ ءَ اِنت-