بلوچستان ءِ شال ءُ تلتان ءِ تجارتی راہ ءِ سر ءَ سلاہ بندیں مردمانی نیمگ ءَ دو جتا جتائیں کاروائیانی ھال دیم ءَ اتکگ انت کہ ایشی ءِ تہ ءَ مستونگ ءِ کردگاپ ءِ دمگ ءَ تجارتی گاڑی ءِ دست گرگ ءُ تجارتی گاڑیانی کاروان ءِ سر ءَ سلاہ بندیں اُرش ھوار اَنت ھمے وڑ ھاران ءِ دمگ دالیءَ پاکستانی ءِ کاروان ءِ سر ءَ سلاہ بندیں اُرش ھم بوتگ ۔
دمگی اھوالانی رد ءَ شال ءُ تپتان شاھدگ ءِ سر ءَ بوتگیں اولی وئیل ءَ مستونگ ءِ کردگاپ ءِ دمگ ءِ نزیک ءَ سلاہ بندیں مردماں یک باریں تجارتی گاڑی یے اوشتارینتگ ءُ دست گپتگ۔
ھمے راہ ءِ سر ءَ دگہ یک وئیلے ءَ سلاہ بندیں مردماں سلاہ بندیں اُرش ءَ گوں تجارتی گاڑیانی کاروان ءَ نشانگ جوڑ کتگ۔ بنداتی ھالانی رد ءَ اے اُرش ھما وھد ءَ کنگ بوتگ کہ کاروباری گاڑیانی کاروان چہ شاھدگ ءَ گوزگ ءَ بوتگ۔ اُرش ءِ آسر ءَ ھچ وڑیں جان ءُ مال ءِ تاوان ءِ گڈی ھال ءُ اھوال پدر نہ بوتگ اَنت۔
دومی نیمگ ءَ خاران ءِ دمگ دالی ءَ پاکستانی اُرد ءِ گاڑیانی کاروان ءِ سر ءَ ھم سلاہ بندیں مردمانی اُرش کتگ۔ بنداتی ھالانی رد ءَ اُرش کنوکاں فورسز ءِ کاروان نشانگ جوڑ کتگ بلے اُرش ءِ گیشتریں ھال ءُ اھوال پدر کنگ نہ بوتگ اَنت۔
زانگ بہ بیت کہ شال ءُ تلتان شاھدگانی سر ءَ بلوچستان ءَ تجارت ءُ ٹرانسپورٹ ءِ ھاتر ءَ یک ھاسیں زمینی راھے زانگ بیت کہ ایشی ءِ تہ ءَ چہ ایران ءِ گوما دو نیمگی تجارت ءِ ھاتر ءَ مزنیں کساسے ءَ مال برداریں گاڑی گوز اَنت۔ گوستگیں روچاں بی ایل اے ءَ بلوچستان ءِ شاھدگانی کنٹرول ءُ زرکاری بندش ءِ جار جتگ کہ ایشی ءَ پد بلوچستان ءِ شاھدگانی سر ءَ اُرش برجاہ انت۔