کاگدے پہ بی بی سی ءِ جھگیر بانک سھر بلوچ ءَ
نبشتہ کار: ھسا بجار
دی بلوچستان پوسٹ
دروت ءُ دراہ بات اِت، دوا کناں شما دراہ ءُ سلامت اِت۔ بانکیں گھار ! دلوں وش اِنت کہ یک بلوچ گھارے یک انچیں جاھے ءَ اِنت کہ کم ءُ گیش سرجمیں جھان ءِ ھال چہ ھمود ءَ شنگ بنت۔ ھستیں وھد ءُ دور شُتگ، بلے زیک کہ پہ زیردست ءُ نزوریں راجاں کہ ھالرسانی ءِ سوب بس یک ءُ تھنائیں ریڈو اَت۔ ءُ پہ راجی جنز ءُ وانندھیں ورنائیں گلاں بی بی سی چو ملا ءِ پرز ءَ واجب اَت۔ دومی آل انڈیا ریڈو اَت ءُ چہ اوگان ءَ بلوچی ھال گوں شیرکنیں رکشانی گالوار ءَ ءُ راجی سوت۔ ءُ چہ زاھدان ءَ ملا کمالان ءِ شیر اِت اَنت۔
من وتی نودربری ءِ زمانگ ءَ بی ایس او ءِ باسک بیگ ءِ سوب ءَ گوں بی بی سی ءَ اولی بر ءَ چہ ماما ءِ ریڈو ءَ آشنا بیتاں ۔ ماما ازمائیل کہ وتی ورنائی ءُ اُمبر ئِے کراچی ءَ گوازینتگ اَت ۔ ءُ بھٹو ءِ مریدے اَت ۔مئے میتگ گُرکانی سیچی ءَ ھم وتی لوگ ءِ سر ءَ پی پی پی ءِ سے رنگی بیرک ئےِ جتگ اَت کہ مئے میتگ ءِ مردماں نزانتگ اَت پی پی پی چی یے، بس ووٹ کہ بیت واجہ داد کریم کیت ووٹ میر مھمد الی ءَ دیگی اِنت ءُ میر ءِ کہ پوج ءَ ھرجاہ گرز بیت گُت ئےِ کنت ۔ بلے ماما ءِ بان ءِ سر ءَ پی پی پی ءِ بیرک ءُ پیژگاہ ءَ آبدہ پروین ءُ گوربام ءُ سرشپ ءُ بی بی سی ءِ وشیں ساز ءِ توار کہ نی پھک بیگواہ اِنت ، پد ءَ کہ من ءَ وت ءَ گونڈوکیں ریڈوے بوت، گُڑا من ھرجاگہ شُتاں من ءَ گون اَت داں مئے میتگ ءِ پئریمری اسکول ءِ ماشٹر کہ ٹرکی ڈیورے بیت ءُ دگہ ماشٹرے ءِ جاگہ ءَ نیم پکار ءَ چیروکائی کار ءَ بیت، وھدے کہ تچ اِیت تا منی ریڈو ءَ دُز اِیت۔
بانکیں گھار ! منی گپ دگہ نیمگے سر مہ کش اِیت۔ گپ اِنت بی بی سی ءُ آئی ءِ ھالرسانی ءِ گوں شپی نکئی جامئی ، رزا الی آبدی ءُ سریا شھاب ءِ وڑیں وشتواراں پد ءَ بی بی سی ایوک ءَ ھال ءِ گوشدارگ نہ اَت ،ھال ، ھالانی سر ءَ چمشانک دیگ ، سیربین ءَ ھوار جتا جتائیں مراگش پہ چُکاں کسمانک “ جھان نما“گوں سیدو بھائی ءِ کندینگاں ۔ سائنس، دپتر ۔ سپرنامگ ۔ ملکانی درگت ءَ چش کہ “دریائے سند کے باسی “ءُ دگہ بازیں ۔ مئے وشتریں چیز کاگد اِت اَنت کہ ما وتی ملک ءُ ھندانی جیڑہ بیان کتگ اَنت ، نشت ءُ وتی کاگدانی وانگ ءُ وتی ملک ءُ جند ءِ نامانی ءِ ودار کُت ءُ آ دگہ گپے کہ مئے نام ءُ مئے جاگھانی نام اِش رد گپت اَنت۔ (تئی آیگ ءَ مئے اے جیڑہ ھم گیشتگ اَت بلے نی ناں ریڈو منتگ ءُ ناں من اود ءِ ھال ءَ سرپداں۔) زمانگ مٹ بوت ، زندہ باد ءُ مردہ باد ءِ سیاست ءَ ساہ دات ۔ بلوچ راجی جھد ءَ وتی چل سال ءِ سپر ءِ کلیں جھلی بُرزیاں ھوار تچک ءُ مادنین راہ کہ گپت تا سرکار ءِ آ تب کہ اوگام ءِ سیاست ئیگ اَت چٹا مٹ بوت ءُ بلوچ جنگ ءَ کپت تا بی بی سی چد ءُ دوستناک بوت ۔ مستریں تورگ بی بی سی ءِ ریڈو ءِ بند بیگ ءَ بوت۔ روتاک توار ءُ ماھتاک سنگر کہ بلوچ راجی جنز ءِ راستیں اھولکاری ءَ کنگ ءَ اِت اِنت ھندی دروشم ءَ آ کہ بند بوت انت گڑا ھرچی اَت ھمے بی بی سی اَت کہ اے ھم بند بوت ءُ کوچگ زُرمب بوت اَنت۔
بی بی سی ءَ کہ ما جھان ءِ پلگارتریں ھالرسانی درے سرپد ئِے بیتگیں ۔ بلے آڈول ءَ نہ اِنت ۔ بگند ئے، من نزاناں کہ آئی ءِ سر ءَ وتی سرکار ءِ چہ ھد ءَ بندش ھست اِنت ، زردار ءُ سامراجی واکانی دست ءَ چہ ھد ءَ آجو اِنت پہ زیردست ءُ لگتمالیں راجانی ھالانی دیگ ءَ ھدا بزانت۔
اگاں ما بی بی سی ءِ چٹا ناشگری ءَ بکنیں گڑا الم میاریگ بئیں ، چُش کہ بلوچ راجی رھشوں واجو داکتر اللہ ءِ گلگدار ءُ وسعت اللہ ءِ دپتری بے مٹیں نبشتانک پہ شھید کندیل ءَ بلے بی بی سی ءِ مستریں گلگ اگاں بلوچ ئیگ اِنت تا آ اِنت ماں بی بی سی ءِ اردو ءِ کارندھانی کٹریں پاکستانی سوچ ۔ مُشکل اِیش اِنت کہ پنجاپی ءُ پٹھان ھرچی یے اول آ پاکستانی یے ۔ وسعت الل گوادر ءِ سر ءَ مراگش کنت ، بلوچ ءِ دپتر ءَ یک ھدے ءَ ڈس اِیت ۔ دیم ءَ شھید کندیل ءِ سر ءَ نبشتہ ھم کنت۔ بلے وھدے کہ گپ جھان ءِ دیم ءَ پاکستان ءِ زوگیری ءُ آئی ءِ بلوچستان ءِ سر ءَ وتی زوگیری ءَ برجاہ دارگ ءِ ریاستی زوراکیانی کہ کیت گُڑا واجہ ءِ شاھیم مُک جنت۔ ما آیاں پہ ایشی ءَ پمیشکا میار بار کنیں کہ اھلوالکاری باید گوں ایمانداری ءَ کنگ بہ بیت۔ ھر مدام کہ ٹوھیں ماملات کہ مزنیں ادارگاں بوتگ اِنت گڑا پنجاپی ءُ پھٹاناں مدام پاکستان ءِ زوراکی ءُ زوگیری ھیلہ چیر داتگ اِنت۔
منی بانکیں گھار! :بلے وھدے کہ تئی نام اشکُت ءُ تئی اھوالے منی دیم ءَ گوست، تو بلوچ راجی گُشندہ اُستاد مھناج مکتار ءِ گھگیری گشندھی ءِ درگت ءَ گپ جتگ اَت، دلوں باز وش بوت کہ اینچک درامد ءِ تہ ءَ یک وتیگے ھست کہ مئے درد ءَ وتیگ کنگ ءُ چو نزیگ ءَ مارا چارگ ءَ اِنت۔ وھدے تئی گپ بندات بوت اِنت داں آسر بوت اَنت ۔ من ایکوی گوش روپتگ اِت اَنت کہ ھیند ءُ ناھیندہ تو اُستاد ءِ نام ءَ الم گرئے ، بلے تو نہ گپت ، من ءَ سک بد اتک ھما مردم ءِ سر ءَ کہ ترا اے درگت ءَ سرپدی داتگ ئِے ، بلے اُستاد ستار چتور شمشتگ ئِے کہ آشوبی مراگشانی براہ ھما بیتگ ءُ زگریں آشوبی یے بیتگ۔ نورل رندی یے۔ ھیر منی گوں تو ھال کنگ ءِ مستریں نیمون اول تئی منت ءِ گرگ کہ تو گوں ایرتی ءَ مارا چارگ ءَ ئے مئے درد ءَ مارگ ءَ ئے ۔ بلوچ گُش اِیت “ وتی کُش اِیت روچ ءِ سر ءَ دور ند اَنت۔ “ الم تو گوں وتی کار ءُ ادارگ ءَ ایماندار بئے ءُ بلوچ ءِ درد ءَ چد ءُ گیشتر جھان ءِ دیم ءَ گوں اھوالکاری بودناکی ءُ ایمانداری ءَ دیم ءَ کاربئے۔ سلامت بات ئے سوبیں بات ئے
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-