ایمنسٹی انٹرنیشنل ءِ گوریچانی ایشیا ریجن ءَ پشتون تحفظ مومنٹ ءِ کور کمیٹی ءِ باسک زبیر شاہ آغا ، بلوچ یکجھتی کمیٹی ءِ سید بی بی ءُ اھوالکار احمد فرہاد ءِ یل کنگ ءِ لوٹ کتگ ءُ گوشتگ پاکستانی سرکار واکداری کانوداں ایمنیں بگیر داروکانی بگیری ءَ کارمرز کنگ ءَ بند بہ کنت ۔
ایمنسٹی انٹرنیشنل ءِ شنگ کرتگیں درشان ءِ رد ءَ 28 جون ءَ ماں شال ءَ بلوچ یکجھتی کمیٹی ءِ نیمگ ءَ ڈاکٹر ماھرنگ بلوچ ءَ دیگ بوتگیں سزائے درگت ءَ برجم داشتگیں پریس کانفرنس ءَ بھر زورگ ءَ پد زبیر شاہ آغا زورانسری دزگیر کنگ بوتگ ۔
درشان ءِ تہ ءَ گوشگ بوتگ زبیر آغا شاہ ایم پی او آرڈیننس 3 ءِ رد ءَ دزگیر کنگ بوتگ وھدیکہ آئی ءِ دزگیری پاکستان ءِ تہ ءَ باسک ، اھوالکار ءُانسانی ھکانی پھازداراں انتزامی حراست ءِ واک ءَ چہ آجوئی ءَ چہ زبھر کنگ ءِ نوکتریں درور ئے ۔
ایمنسٹی ءِ رد ءَ زبیر آغا شاہ ءِ وڈا سید بی بی بلوچ ھم یک جولائی ءَ ماں تربت ءَ ڈاکٹر ماھرنگ بلوچ ءَ دیگ بوتگیں سزا ءِ بگیری ءَ بوکیں زھرشانی ءَ ساری ایم پی او ءِ رد ءَ دزگیر کنگ بوتگ ۔
درشان ءِ تہ ءَ گوشگ بوتگ 20 جون ءَ اھوالکار احمد فرہاد ھم پاکستان ءِ ایردستیں جموں کشمیر دمگ باگ ءَ ایم پی او ءِرد ءَ دزگیر کنگ بوتگ کہ ھنگت بیگواہ انت ۔
ایمنسٹی ءَ وتی درشان ءِ تہ ءَ لوٹ کتگ ءُ گوشتگ کہ پاکستانی سرکار زبیر شاہ آغا ، سید بی بی بلوچ ، احمد فرہاد ءَ زوت یلا بہ کنت ءُ انتظامی کانودانی رد کارمرزی ءَ ھلاس بہ کنت ءُ آجوئی ءَ مردماں گپ جنگ ءِ ھک ، ایمنیں زھرشانی ءُ بنکی ھکانی شرپ بہ دار ایت ۔