کردگاپ ءُ زھری ءَ پاکستانی پوج ءُ مڈی بروکیں گاڑیانی سر ءَ اُرش کنگ بوتگ

بلوچستان ءِ جتاجتائیں دمگ زھری ءُ کردگاپ ءَ پاکستانی پوج ءُ مڈی بروکیں گاڑیانی سر ءَ سلاہ بنداں اُرش کتگ ءُ کارندھانی سلاہ برتگ اَنت-

ھُزدار ءِ دمگ زھری ءَ پاکستانی پوج یکرندے پد ءَ اُرشانی دیمپانی کنگ کپتگ – سرجمیں روچ ءَ برجاہ بیتگیں میڑاں پوج ءِ تاوانانی دیمپانی کنگ کپتگ، اُشکاراں پوج ءِ سلاہ ءُ گولہ شورو دستیگ کتگ اَنت-

زھری ءِ دمگ بلبل ءَ گوستگیں روچ ءَ یکرندے پد ءَ پاکستانی پوج ھما وھد ءَ اُرشانی دیمپانی کنگ کپتگ وھدے پوج ءَ دمگ ءَ بازیں گاڑیاں، آیانی تہ ءَ بکتر بند ءُ ٹینک ھوار بیتگ اَنت کہ پیشگامی کنگ ءَ بیتگ اَنت-

ھالانی رِد ءَ اُرشکاراں پوج ءِ سلاہ ءُ گولہ شورو ھم دستیگ کنگ ءَ سوبمند بیتگ اَنت بلے جانی تاوانانی درگت ءَ چہ واکدار تنی وھدے ھچ وڑیں درشان دیم نیتکگ-

گوستگیں روچاں ھمے دمگ ءَ پاکستانی پوج اُرشاں جانی تاوان چست کنگ کپتگ- اے اُرش ءِ زمہ واری بلوچ سلاہ بندیں گل ھمسنتیں بلوچ راجی آجوئی سنگر (براس) منّ اِتگ اَنت-

ھمے وڑ بیگاہ ءِ وھد ءَ مستونگ ءِ دمگ کردگاپ ءَ سلاہ بندیں مردمانی مزنیں کچے ءَ شال – تفتان شھدگ (آر سی ڈی ) سر ءَ سیندک پروجیکٹ ءَ چہ مڈی بروکیں نُھ ٹرالر گاڑی ءُ آیانی سیکورٹی دیوکیں پوج ءِ سے گاڑی اُرش ءِ نشانگ کتگ اَنت-

اِھوالکار ءِ رِد ءَ اُرش ءِ آسر ءَ مڈی بروکیں گاڑیاں سک تاوان رس اِتگ وھدے کہ پوج ءَ ھم جانی ءُ مالی تاوان ءِ دیمپانی کنگ کپتگ-

یک دمگی اِھوالکارے ءَ ٹی بی پی ءَ گْوشتگ کہ پیسر ءَ سنگر گپتگیں اُرشکاراں وتکاریں سلاھاں ھوار راکٹ لانچر کارمرز کتگ اَنت – اود ءَ داں دیراں تراکانی توار اش کنگ بیتگ- واکدار ءَ تنی وھدے اے درگت ءَ ھچ وڑیں درشان دیم ءَ نیتکگ-

تنی وھدے اے اُرشانی زمہ واری ھچ گل ءَ نہ زرتگ اَنت-